Аллоҳ таоло бандаларига қандай қилиб ислом, иймон, эҳсон ва қиёмат таълимини етказгани ҳақида ҳадис

«Кун ҳадиси» дастурининг бугунги сонида тақдим этиладиган ҳадис мазмуни «Иймон ва Ихлос» деб номланади. Бу мавзу ҳақидаги ҳадисни «Мирзо Юсуф» жоме масжиди имом хатиби Саййид Раҳматуллоҳ Термизий шарҳлаб берди.

Видео: Youtube

Умар ибн Хаттоб розияллоҳу анҳудан ривоят қилинади:

«Бир куни Расулуллоҳ соллаллоҳу алайҳи васалламнинг ҳузурларида эдик. Бирдан олдимизда оппоқ кийимли, сочлари қоп-қора одам пайдо бўлди. Унда сафарнинг асари кўринмас эди. Уни бирортамиз танимас ҳам эдик. У келиб Расулуллоҳ соллаллоҳу алайҳи васалламнинг тўғриларига ўтирди. Икки тиззасини у зотнинг икки тиззаларига тиради. Икки кафтини сонлари устига қўйди ва: «Эй Муҳаммад, менга Ислом ҳақида хабар бер», деди.

Расулуллоҳ соллаллоҳу алайҳи васаллам: «Ислом: «Лаа илаҳа иллаллоҳу Муҳаммадур Расулуллоҳ» деб шаҳодат келтирмоғинг, намозини тўкис адо қилмоғинг, закот бермоғинг, Рамазон рўзасини тутмоғинг, агар йўлга қодир бўлсанг, Байтни ҳаж қилмоғинг», дедилар.

«Тўғри айтдинг», деди у. Биз ундан ажабландик. Ўзи сўрайди, ўзи тасдиқлайди. «Менга иймон ҳақида хабар бер», деди.

У зот соллаллоҳу алайҳи васаллам: «Аллоҳга, Унинг фаришталарига, китобларига, пайғамбарларига ва охират кунига иймон келтирмоғинг, яхшию ёмон қадарга иймон келтирмоғинг», дедилар.

«Тўғри айтдинг», деб тасдиқлади ва: «Менга эҳсон ҳақида хабар бер», деди.

У зот соллаллоҳу алайҳи васаллам: «Аллоҳга худди Уни кўриб турганингдек, агар сен Уни кўрмасанг, У сени кўриб тургандек ибодат қилмоғинг», дедилар.

«Менга (қиёмат) соатидан хабар бер», деди.

У зот соллаллоҳу алайҳи васаллам: «Сўралувчи бу ҳақда сўровчидан билимлироқ эмас», дедилар.

«Унинг аломатларидан хабар бер», деди.

У зот соллаллоҳу алайҳи васаллам: «Чўри ўз хожасини туғмоғлиги, ялангоёқ, яланғоч, камбағал чўпонларнинг бино қуришда бир-бирларидан ўзишга уринишларини кўрмоғинг», дедилар.

У зот соллаллоҳу алайҳи васаллам менга: «Эй Умар, сўровчи кимлигини билдингми?» дедилар. «Аллоҳ ва Унинг Расули билувчироқ», дедим. У зот соллаллоҳу алайҳи васаллам: «Албатта, у Жаброилдир. Сизларга динларингиздан таълим бергани келибди», дедилар».

Аслида, бу узун ҳадис. Бу ҳадисда пайғамбар алайҳиссалом ва Жаброил фаришта икковлари таълим жараёнини ажойиб бир суратда убун умматга, инсониятга сабоқ тариқасида кўрсатиб беряптилар. Бу ҳадиси шариф толиби илм одобини баён қилади, нималарни билишимиз кераг-у, нималарга билим даъвосини қилишга ҳаққимиз йўқлигининг хабарини беради. Ушбу ҳадис, бундан ташқари, устоз-шогирд одобини баён қилади.

Ушбу ҳадисда кўтарилган мавзулар муҳим мавзулар эди. Аллоҳ таоло муқаддас фариштасини инсон қиёфасида юбориб, пайғамбар алайҳиссалом билан савол-жавоб қилиш орқали бандаларига бунинг таълимини берди.

Ҳа азизлар, ҳар бир ишни эҳсон қилишимиз мумкин. Ҳар бир ишни жойига қўйиб бажаришимиз мумкин, худди Роббимиз бизни кўриб турганидек. Ана шунда бизнинг ишларимиздан Аллоҳ рози бўлади, халққа манфаат келади ва ўзимиз иншаАллоҳ карим кўпроқ савоб қозонган бўламиз.

Мен ўзимни ҳам, сизларни ҳам яхши амаллар билан рамазон ойидан кўпроқ савоб қозонишга чақираман.