Россия президенти Владимир Путин G20 саммити доирасида Британиянинг Financial Times газетасига интервью берди. Путин интервьюсида хусусан, АҚШ ва Хитой билан муносабатлар, Суриядаги операция, Сергей Скрипалнинг заҳарланиши хусусида сўз юритди.

Дональд Трамп ҳақида

«Жаноб Трамп карьерали сиёсатчи эмас, унинг дунёга ва АҚШ миллий манфаатларига нисбатан ўз қараши бор. Масалан мен унинг муаммоларни ҳал қилишдаги аксарият усулларига қўшилмайман. Аммо мен қандай фикрдаман, биласизми? У истеъдодли инсон. У сайловчи ундан нима кутаётганини жуда яхши тушунади».

Хитой билан муносабатлар ҳақида

«Бизнинг ҳеч кимга қўшилишимизнинг ва бировларга қарши ўз сиёсатимизни қуришимизнинг кераги йўқ. Биз Хитой билан ҳеч кимга қарши сиёсат юритмаяпмиз. Биз шунчаки ҳамкорликни ривожлантириш бўйича режаларимизни босқичма-босқич амалга оширяпмиз, буни 2001 йилдан буён қилмоқдамиз ва бу режаларни амалга ошириш йўлидан бормоқдамиз».

Шимолий Корея ҳақида

«Шимолий Кореянинг ўз хавфсизлигини таъминлаш борасидаги қонуний хавотирига ҳурмат билан ёндашиш лозим. Уни ҳурмат қилиш ва Шимолий Корея амин бўладиган хавфсизликни таъминлаш йўлини топиш керак. Агарда бу амалга ошса, ишонинг, вазият ҳеч ким кутмаётган даражада ўзгара бошлайди».

Суриядаги операция ҳақида

«Биз мен кутгандан кўра кўпроқ натижага эришдик. Биринчидан, Россияга – ёки Россияга ёки биз билан виза режими йўқ давлатларга қайтишни режалаштирган кўпсонли жангарилар йўқ қилинди – гап бир неча минг киши ҳақида бормоқда. Униси ҳам, буниси ҳам биз учун бирдек хавфли. Бу биринчидан.

Иккинчидан: географик жиҳатдан бизга яқин бўлган минтақадаги вазиятнинг барқарорлашишига эришдик. Бу ҳам жуда муҳим. Шу орқали Россиянинг ичидаги хавфсизликни таъминлашга бевосита таъсир кўрсатдик – бу учинчидан.

Тўртинчидан: биз минтақадаги барча давлатлар билан етарлича яхши муносабат ўрнатдик ва бизнинг Яқин Шарқ минтақасидаги позициямиз барқарорлашди. Нафақат Эрон ва Туркия, балки минтақадаги бошқа давлатлар билан ҳам дўстона, ҳамкорлик, айрим жиҳатларда иттифоқчилик муносабатлари шаклланди».

Венесуэла ҳақида

«Мен бу ҳақда кўп марта ва америкалик ҳамкорларимизга ҳам айтганман: у ерда бизнинг қўшинларимиз йўқ. Тушуняпсизми? Мутахассислар бор, йўриқчилар бор, улар ишлашяпти. Шу билан бирга, яқинда, чамаси бир ҳафта олдин маслаҳатчи ва мутахассисларимиз гуруҳи у ердан чиқиб кетди, улар у ердан кетишди. Қанчадир вақтдан сўнг яна қайтишлари мумкин.