DW хабарига кўра, Путин бу ҳақда 1 октябр куни «Валдай» халқаро мунозара клубининг ялпи мажлисида гапирган.
Унинг сўзларига кўра, Украина Россиядаги нефтни қайта ишлаш заводларига ҳужум қилиш орқали мамлакат иқтисодиётига зарар етказишни кўзлаган.
«Мақсадга эришдими? Қисман», — деган Россия президенти.
Путин бундай зарбалар оқибатидаги йўқотишни Россия ЯИМнинг тахминан 1 фоизи деб баҳолаган.
У Москва бунга жавобан Украина иқтисодиёти учун муҳим деб ҳисоблаган объектларга зарба бераётганини айтган. Путин, жумладан, Украина металлургия тармоғи амалда ишдан тўхтаганини даъво қилган. Унинг иддаосича, ушбу тармоқ қурол ишлаб чиқаришда ҳам қўлланади.
Йирик заводларда ишлаб чиқариш қисқарган
Сўнгги ойларда Россия нефтни қайта ишлаш заводларига уюштирилган зарбалар ёнилғи ишлаб чиқаришда узилишларга олиб келган.
Reuters маълумотларига кўра, Россиядаги олтита йирик дизел ишлаб чиқарувчи корхона мамлакатдаги ушбу ёнилғи ишлаб чиқаришининг қарийб ярмини таъминлаган. Бироқ сентябр ойида уларнинг бир нечтаси ишлаб чиқаришни кескин қисқартирган ёки бутунлай тўхтатган.
Хусусан, Кириши нефтни қайта ишлаш заводи фаолиятини тўлиқ тўхтатган. Волгоград заводи ва NORSI корхонаси эса белгиланган қувватининг тахминан тўртдан бир қисмида ишлаган.
Халқаро энергетика агентлиги маълумотларига кўра, 2026 йилнинг дастлабки саккиз ойида Россиядаги нефтни қайта ишлаш заводларига ўртача ҳар уч кунда бир марта муваффақиятли зарба берилгани қайд этилган.
Дизел экспортига тақиқ узайтирилган
Корхоналардаги узилишлар Россиядан ёнилғи экспортига чекловлар жорий этилишининг сабабларидан бири бўлган.
Reuters 30 сентябр куни Россия ҳукумати дизел экспортига қўйилган тақиқни октябр охиригача узайтирганини хабар қилган.
Бунгача ҳам ёнилғи тақчиллиги ва ички бозорда нархлар ўсиши фонида экспорт чекловлари бир неча марта жорий этилган эди.
