Россия президенти Владимир Путин 1 октябр куни «Россия» миллий марказида «Валдай» халқаро мунозара клубининг ялпи сессиясида нутқ сўзлади. РБК нашри асосий иқтибосларни келтирди.
У халқаро вазиятнинг кескинлашуви ва сунъий интеллектнинг ривожланиш хавфлари ҳақида огоҳлантирди, шунингдек, НАТОга юборилган хатларнинг маъносини тушунтирди ва қуролли қарама-қаршилик қоидалари масаласини кўтаришга чақирди.
Дунёдаги вазият ҳақида
Путин ўз нутқини «кўпгина эски ҳуқуқ нормалари бекор қилинган, янгилари эса ҳали пайдо бўлмаган» шароитда глобал тинчлик ва хавфсизликни сақлашга чақириқ билан бошлади. Унинг таъкидлашича, ўзгаришлар барча соҳаларда, жумладан, технологиялар, жамиятнинг ижтимоий тузилиши, ҳарбий соаҳада, умумий рақамлаштириш ва иқтисодиётда юз бермоқда.
«Эртами-кечми халқаро вазият ва тизим қандайдир барқарор мувозанат ҳолатига келади. Албатта, бу мураккаб, кўп омилли, кўп қатламли жараён бўлиб, ўзаро муроса ва бир-бирига қараб ҳаракат этишни талаб қилади. Бироқ, дунёда қандай сценарий амалга ошмасин, халқаро можароларнинг давом этиши эҳтимоли юқори. Хусусан, юз бераётган туб ўзгаришлар ва бу борада очилаётган имкониятлар йирик бўлиб туюлган ютуқ учун таваккал қилишга тайёрликни ва амбицияларни рағбатлантираётгани, озиқлантираётгани сабабли ҳам шундай. Бу баҳода янглишишни истардим, аммо бугунги куннинг барқарор тенденциялари, афсуски, айнан шундай» — деди у.
Украина ва Ғарб билан муносабатлар ҳақида
Путиннинг сўзларига кўра, Россия онгли равишда «қўлида қурол билан ўзини ҳимоя қилишга» ва «тажовузга жавоб беришга» мажбур бўлган вазиятга қўйилган.
«Биламан, албатта, экспертлар ҳамжамиятининг бир қисмида савол туғилади: мана, Россия тинчлик ҳақида гапиради, ўзи эса урушни бошлади. Хўш, мен бу ҳақда кўп марта гапирганман, ҳар ҳолда бундай йиғилишда яна бир марта айтаман: ҳақиқат қаерда? Ҳақиқат шундаки, биз урушни хоҳламадик ва биз урушни бошламадик, балки биз билан урушни бошладилар» — деди у.
«Куч бор — ақл керак эмас» тамойили баъзи жаҳон ўйинчилари учун устувордек туюлади, аммо бу ҳеч қачон яхшиликка олиб келмайди.
«Яна бир бор таъкидламоқчиманки, Украинада содир бўлаётган воқеалар ҳам коллектив Ғарбнинг Россияга қарши тажовузидир» — деди Путин.
