«Тинчлик корпуси» Ўзбекистонга қайтадими? АҚШ элчиси изоҳ берди

АҚШнинг Ўзбекистондаги элчиси Даниэл Розенблюм Тошкентда журналистлар билан учрашув ўтказди. Тадбирда элчига «Тинчлик корпуси»нинг Ўзбекистонга қайтиши бўйича савол берилди.

Маълумки, дунёнинг 139 мамлакатида кўнгилли хизмат кўрсатадиган «Тинчлик корпуси» ташкилоти ривожланаётган давлатларда ижтимоий тараққиёт йўлида ёрдам кўрсатувчи дастурга эга. Ташкилот Ўзбекистондаги 12 йиллик фаолиятидан сўнг, 2005 йилнинг июнида мамлакатдан чиқиб кетган.

«Тинчлик корпуси» Ўзбекистонда ишлаганини кўпчилик яхши билади. 2005 йилга қадар ўз фаолиятини олиб борган. Умид қиламизки, «Тинчлик корпуси» мамлакатга қайтади. Сабаби, у давлатларимиз халқлари ўртасида тўғридан-тўғри алоқаларни ривожлантириш, инглиз тилини ўрганиш ишларига катта ҳисса қўша олади. Тил ўрганиш, инглиз тилида дарс бериш бўйича жараён ҳам Ўзбекистон президенти, ҳам ҳукумат ва Халқ таълими вазирлиги учун устувор жиҳатга эга. 

«Тинчлик корпуси» масаласи бизнинг Ўзбекистон ҳукумати билан мулоқотимиз бир қисми саналади. Ушбу масала бир қанча муддат давомида муҳокама қилинди. Умид қиламизки, «Тинчлик корпуси» яқин вақт ичида ўзининг баҳоловчи жамоасини Ўзбекистонга юбора олади. У давлатга келиб, баҳолаш ишлари ҳамда ўз дастурини бошлайди. Бу ташриф бўйича аниқ режалар ҳозирча белгиланмади. «Тинчлик корпуси» икки томонлама муносабатларни ривожлантириш ва Ўзбекистонда инглиз тилини ўрганиш ишларига катта ҳисса қўшиши аниқ», - деди элчи.

Бундан олдин, Даниэл Розенблюм журналистларга ўз ишини қилишига имкон бериш кераклигини айтганди.