Бош вазир тадбиркорлар билан янги форматда мулоқот ўтказди

Президент Шавкат Мирзиёевнинг тадбиркорлик фаолиятини қўллаб-қувватлашга доир Фармонига мувофиқ бугун, 22 июль куни Бош вазир Абдулла Арипов Қорақалпоғистон Республикасида фаолият юритаётган 60 нафар тадбиркорни видеоконференц-алоқа воситаси орқали қабул қилди.

Kun.uz манбасининг хабар беришича, тадбиркорлар ўз фаолиятида дуч келаётган айрим муаммоли масалалар юзасидан Бош вазирга мурожаат қилган.

Хусусан, тиббий шприц, инфузион система ишлаб чиқариш учун тегишли рухсатнома олиш, қизилмия ва бошқа доривор ўсимликларни етиштириш ҳамда саноат усулида қайта ишлашга кредит маблағини жалб этиш, қишлоқ хўжалиги техникаларини харид қилиш, «Ёшлар келажагимиз» давлат дастурига асосан имтиёзли кредит маблағини олиш сингари қатор масалалар кўриб чиқилди.