Саудия Арабистонида хорижликларга туризм соҳасида лавозимларни эгаллаш тақиқланди

Фото: РИА Новости / Владимир Вяткин

Саудия Арабистони меҳнат ва ижтимоий ривожланиш вазирлиги хорижликларга туризм соҳасида 20га яқин лавозимни эгаллашни тақиқлади. Бу ҳақда Saudi Gazette нашри хабар берди.

Нашрнинг ёзишича, чекловлар уч юлдузли ва ундан юқори бўлган барча меҳмонхоналар ҳамда туристлар учун апартаментларга тааллуқли. Хорижликлар эгаллай олмайдиган лавозимлар қаторига бронлаш ва маркетинг бўйича мутахассис, меҳмонхона директори ўринбосари, савдо бўлими раҳбари, спорт клуби супервайзери ва бошқалар киритилди.

Эндиликда фақат Саудия Арабистони фуқароларигина юк қабул қилиш ва хоналарга буюртма олиш, ресторан ва кафеларда официантлик қилиши мумкин.

Чекловлар йил охиридан бошлаб амал қила бошлайди ва келгуси йил охиридан тўлиқ кучга киради.

Аввалроқ қироллик фуқароларининг ишсизлик даражасини пасайтириш мақсадида савдо соҳасининг 12та йўналишида ана шундай қарор қабул қилинганди.