Россия янги космик станция учун уч йилда 136 млрд рубл ажратмоқчи

Бу рақамлар Россия федерал бюджети лойиҳасига илова қилинган материалларда келтирилган.

Режага кўра, 2027 йилги маблағларнинг бир қисми Россия орбитал станцияси — РОС лойиҳасини амалга ошириш учун зарур инфратузилмани ривожлантиришга йўналтирилади.

Хусусан, космик мажмуанинг ердаги инфратузилмасини яратиш учун қарийб 2,1 млрд рубл ажратиш кўзда тутилган. Станцияни яратиш учун зарур объектларнинг капитал қурилишига эса яна қарийб 2,36 млрд рубл режалаштирилган.

Бюджет лойиҳасининг тушунтириш хатида «Экипажли космонавтика» федерал лойиҳаси бўйича харажатлар ҳам келтирилган. Унга:

• 2027 йилда — қарийб 112,46 млрд рубл;

• 2028 йилда — қарийб 107,8 млрд рубл;

• 2029 йилда — қарийб 119,5 млрд рубл ажратилиши режалаштирилмоқда.

Ушбу кўрсаткичлар кенгроқ «Экипажли космонавтика» лойиҳасига тааллуқли бўлиб, уларнинг барчаси фақат орбитал станция қурилиши учун мўлжалланмаган.

РОС бўйича келтирилган 136,72 млрд рубл ҳам станциянинг бутун қурилиш давридаги якуний қийматини англатмайди. Бу 2027–2029 йилларда уни яратиш ва эксплуатациясини таъминлаш учун бюджет лойиҳасида назарда тутилган маблағдир.