BEST — Burning Plasma Experimental Superconducting Tokamak — Хитойнинг шарқидаги Анхой провинцияси маъмурий маркази Хэфэй шаҳрида қурилаётган экспериментал ўта ўтказувчан токамакдир.
«Сунъий қуёш» деб таърифланаётган лойиҳа бошқариладиган термоядровий синтезни ўрганишга қаратилган. Унинг мақсади — Қуёш энергиясининг асосини ташкил этувчи ядро синтези тамойилидан Ерда энергия олиш учун фойдаланиш имкониятларини синаш.
Хабарда қурилма учун мўлжалланган мажмуа расман фойдаланишга топширилгани айтилган. Бироқ термоядровий қурилманинг ўзида асосий тизимларни монтаж қилиш ишлари давом этмоқда.
Асосий қисмларни ўрнатиш бошланган
Июл ойидан қурилиш майдонига бир нечта муҳим компонент етказиб берилган. Уларни ўрнатиш ишлари босқичма-босқич олиб борилмоқда.
Ҳозирда вакуум камераси, криоген экран, тороидал магнит тизимлари ва бошқа юқори аниқликдаги ички қисмлар монтаж қилинмоқда. Шу тариқа, қурилманинг асосий қисми қурилишнинг энг масъулиятли босқичига кирган.
Қурилма қандай ишлайди?
Вакуум камераси термоядровий синтез жараёни кечадиган ишчи муҳит вазифасини бажаради.
Криоген экран иссиқлик узатилишини чеклаб, совитиладиган қисмларни ҳимоя қилишга хизмат қилади.
Тороидал магнит тизимлари эса кучли магнит майдони ҳосил қилади. Бу майдон юқори ҳароратли плазмани ушлаб туриб, унинг реактор деворларига тегишининг олдини олади.
2030 йил атрофида энергия олишни намойиш этиш режалаштирилган
BEST қурилишини 2027 йилгача тугаллаш режалаштирилмоқда. Кейинги мақсад — тахминан 2030 йилда дейтерий ва тритий синтези натижасида энергия олишни намойиш қилиш.
Лойиҳа бошқариладиган ядро синтези ёрдамида саноат миқёсида электр энергияси ишлаб чиқаришнинг принципиал имкониятини текширишга қаратилган.
Бу ҳозирча экспериментал қурилма бўлиб, қурилишнинг якунланиши тижорий электр таъминоти дарҳол бошланишини англатмайди.
