Пентагон бутун Европа бўйлаб қўшин жойлаштиришга тайёрланмоқда

АҚШ армия вазирлиги йирик кучларни Европа мамлакатларига ташиш ва жойлаштириш учун пудратчиларни изламоқда. Бу борадаги тегишли ҳужжат АҚШ давлат харидлари сайтида жойлаштирилди.

Ҳужжатга кўра, Пентагоннинг учта департаментидан бири — армия вазирлиги АҚШнинг Европадаги қуруқлик қўшинлари оператив бирлашиши учун одамлар ва оғир ҳарбий юкларни тижорат ташуви бўйича шартнома тузиш ниятида.  

Унда тахминий манзиллар, чегараларни кесиб ўтиш нуқталари, божхона пунктларидан ўтиш тартиби, асосий йўналиш ва масофа кўрсатилган. Ҳужжатда бутун Европа – Буюк Британиядан Болтиқбўйигача ҳудуд қамраб олинган.

АҚШ ва НАТО ҳарбий базаларига учинчи шахсларнинг қўйилиши борасидаги чекловлар алоҳида кўрсатиб ўтилган. Масалан, Буюк Британия, Руминия ва Польша ҳудуди бўйлаб ҳарбий ташувларга фақат НАТОга аъзо мамлакатлар фуқаролари жалб этилади. Америка техникаси ва аскарларини Испаниядаги базаларга фақат испанлар олиб бориши мумкин. Италия, Германия, Люксембург ва Бельгияда ҳам ўзига хос тақиқлар мавжуд. Фуқаролари шартнома асосида ҳайдовчилик қила олмайдиган мамлакатлар рўйхати ҳам алоҳида кўрсатилган.