Муддатидан олдин ҳарбий унвон ва қимматбаҳо совғалар: «АрМИ – 2019» ғолиблари муносиб тақдирланди

Эслатиб ўтамиз, жорий йилнинг 3-17 август кунлари 10та давлат ҳудудида «АрМИ – 2019» халқаро армия ўйинлари бўлиб ўтди. Мазкур тадбир доирасида 39та давлатдан 32та номинацияда 222та жамоа беллашди. Ўзбекистон Республикаси Мудофаа вазирлигидан 14та жамоа иштирок этди.

«Танк биатлони» ва «Ҳарбий-тиббий эстафета» танловида қатнашган жамоамиз совринли I ўринни, «Содиқ дўст», «Рембат», «Эльбрус ҳалқаси», «Қўшинлар разведкаси аълочилари» – II ўринни ҳамда «Хавфсиз маршрут», «Мусаффо осмон», «Йўл патрули», «Дала ошхонаси», «Артиллерия олови устаси» – III ўринни эгаллади.

2019 йилда жамоаларимиз 14та номинациядан 11тасида (80 фоиз) совринли ўринларни эгаллагани, ўтган йилги натижаларнинг сонига нисбатан қарийб 2 баробарга ортганини кўрсатмоқда.

«АрМИ – 2019» халқаро армия ўйинлари бу йилги натижаларига кўра барча иштирок этган давлатлар ўртасида Ўзбекистон 5 – поғонани эгаллади.

Шу билан бирга, Мудофаа вазирлиги жамоалари таркибида юртимиз шарафини муносиб ҳимоя қилган ҳарбий хизматчилар «АрМИ – 2019» халқаро армия ўйинларида муносиб иштирок этиб, 10дан ортиқ йўналишларда рекорд натижаларни қайд этди.