DW хабарига кўра, компаниялар раҳбарлари 23 сентябр куни Ню-Йоркда БМТ Хавфсизлик Кенгашининг фавқулодда йиғилишида сўзга чиққан.
OpenAI бош директори Сэм Алтман ҳозирги босқичда «ўта эҳтиёткорлик» зарурлигини таъкидлаган. Унинг айтишича, сунъий интеллект тизимлари институтларнинг уларга мослашиш суръатидан тезроқ ривожланиши ёки ҳокимиятнинг жуда тор доирадаги шахслар қўлида жамланишига сабаб бўлиши мумкин.
Алтман катта фойда олиш имконияти соҳада ҳаддан ташқари технологик таваккалчиликка боришни оқламаслигини айтган. У ҳукуматларни технологик келажакни белгилайдиган қарорларни қабул қилишда ўзаро ва соҳа вакиллари билан ҳамкорлик қилишга чақирган.
Anthropic: хавфсизлик учун ривожланиш суръатини пасайтиришга тайёрмиз
Anthropic бош директори Дарио Амодеи янада қатъий хавфсизлик стандартлари зарурлигини таъкидлаган.
«Биз чиқараётган ҳар бир янги сунъий интеллект технологияси ҳақиқатан ҳам хавфсиз эканига ишонч ҳосил қилиш учун ривожланиш суръатини қанча зарур бўлса, шунча секинлаштирамиз», — деган у.
Амодеининг фикрича, сунъий интеллект тегишлича бошқарилмаса, бутун инсоният учун таҳдидга айланиши мумкин.
Hugging Face очиқ кодли технологияларни қўллаб-қувватлади
Hugging Face бош директори Клемент Деланж эса очиқ манбали сунъий интеллект технологияларининг аҳамиятига урғу берган.
DW хабарида келтирилишича, яқинда Hugging Face OpenAIʼнинг автоном дастурий таъминоти томонидан киберҳужумга учраган. Деланж компанияси ҳужумларни қайтаришда ҳам ушбу технологиядан фойдаланганини билдирган.
«Дунё ўзини ҳимоя қилиш учун очиқ манбали сунъий интеллектга ҳар қачонгидан ҳам кўпроқ муҳтож», — деган у.
Трамп «сунъий интеллект кучлари» тузилишини эълон қилди
Бундан аввал, 19 сентябр куни АҚШ президенти Доналд Трамп сунъий интеллектни ривожлантириш масалалари билан шуғулланадиган махсус тузилма — «сунъий интеллект кучлари» ташкил этилишини эълон қилган.
