Видео: Москвада ўзбеклар ва қирғизлар ўртасида оммавий муштлашув рўй берди

24 ноябрь куни Москвада Ўзбекистон ва Қирғизистондан бўлган меҳнат муҳожирлари ўртасида оммавий муштлашув рўй берди. Бу ҳақда РФ Ички ишлар вазирлигининг Москва шаҳри бўйича бўлими матбуот хизмати хабар тарқатган.

Интернетда ушбу оммавий муштлашув видеоси ҳам тарқалган, унда белкурак ва ломлар билан қуролланган ўнлаб ишчилар жанжалига гувоҳ бўлиш мумкин.

ОАВ маълумотига кўра, якшанба куни кечқурун полицияга Москва шаҳри марказидаги Ефремова кўчасида истиқомат қилувчилардан чақириқ тушган. Гувоҳлар кўчада ўнлаб кишилар ўртасида низо юзага келгани ҳақида маълумот беришган.

Воқеа жойига етиб келган полициячилар жанжаллашган ишчиларни қўлга олган. Уларга нисбатан майда безорилик бўйича маъмурий баённома тузилган.

Ҳодиса оқибатида ҳеч ким жароҳат олмагани қайд этилган.

«РЕН.ТВ» маълумотига кўра, Ўзбекистон ва Қирғизистондан бўлган меҳнат муҳожирлари ўзаро футбол ўйинидан кейин баҳслашиб қолишган ва бу низо муштлашувга айланиб кетган. Учрашув вақтида ишчилардан бири ўйин қоидасини қўпол равишда бузгани иккинчи томоннинг «жаҳлини чиқарган».

«Ўйинчилар» кейинроқ «гаплашиб олиш»га келишишган ҳамда кечқурун лом ва белкураклар билан учрашишган», дейилади ОАВ хабарида.