Наманган ва Фарғонада ноқулай об-ҳаво шароити: самолётлар Тошкентга қўнмоқда

Жорий йилнинг 12 декабрь куни Наманган ва Фарғона аэропортларидаги ноқулай об-ҳаво шароити (кучли туман) туфайли, «Москва-Наманган» йўналишида парвоз қилган Red Wings авиакомпанияси самолёти маҳаллий вақт билан соат 05:57да Тошкент халқаро аэропортига қўнишга мажбур бўлди. 

Uzbekistan Airports хабарига кўра, Тошкент аэропортида йўловчиларнинг қулай кутиши учун барча шароитлар яратилди, шу жумладан иссиқ овқат ташкил этилган.

Соат 16:00 ҳолатига кўра, ушбу рейсдаги 219 йўловчининг 61 нафари Тошкент аэропортида қолмоқда. Red Wings авиакомпанияси уларни меҳмонхонада жойлаштириш чораларини кўрмоқда.

Наманган ва Фарғона аэропортларида об-ҳаво шароитлари туфайли кўришнинг чекланиши сақланиб қолмоқда, дейилади маълумотда.

Шунингдек, Uzbekistan airways’нинг Тошкент-Наманган йўналиши бўйича парвоз қилган Airbus A320-214 самолёти Наманган аэропортидаги об-ҳаво шароити туфайли ортга қайтди.

Бундан ташқари, Nordwind авиакомпаниясининг Москва-Наманган йўналишидаги Boeing 737-8SH ҳаво кемаси Наманган аэропортидаги ноқулай об-ҳаво туфайли Тошкентга қўнди.

Uzbekistan airways’нинг Москва-Фарғона рейсидаги Boeing 757-231 самолёти Фарғона аэропортидаги ноқулай об-ҳаво туфайли Тошкентга қўнади. 

Utair’нинг Москва-Фарғона йўналишидаги Boeing 737-8GU ҳаво кемаси Фарғонадаги ноқулай об-ҳаво туфайли Тошкент аэропортига қўнишни режалаштирмоқда.