Камбожада қурилаётган бино қулаши оқибатида 36 киши ҳалок бўлди

Камобжанинг Кеп шаҳрида қурилаётган бино қулаши оқибатида 36 киши ҳалок бўлди, деб хабар берди Khmer Times газетаси.

Хабарда айтилишича, бино жума куни қулаб тушган, аммо ҳалок бўлганларнинг аниқ сони уч кунлик қидирув-қутқарув операцияси якунланганидан сўнг маълум бўлган.

Қутқарувчилар операция давомида етти қаватли бино вайроналари остидан тирик қолган 23 кишини ва 36 нафар ҳалок бўлганларнинг жасадини олиб чиқишган. 

Газетанинг хабар беришича, қурилаётган бино эгалари ҳибсга олинган бўлиб, дастлабки терговда аниқланишича, бино қурилишида сифати паст қурилиш материаллари ишлатилган.

Камбожа бош вазири Хун Сен ҳалок бўлганларнинг оилаларига 52 минг доллардан ва жароҳатланганларга 10 минг доллардан компенсация тўланишини маълум қилди.