Австралия табиати кучли ёнғинлардан кейин жонлана бошлади (фото)

Австралияликлар мамлакатларида бир неча ой давом этган кучли ёнғинлардан кейин катта талофат кўрган табиат яна жонлана бошлаганини акс эттирувчи суратлар билан бўлишишмоқда. Жумладан, улар ёнғиндан қоп-қора кўмирга айланган дарахтлар яна куртак ёзаётгани, кули кўкка совурилган ерларда ўсимликлар бўй чўзаётгани суратларини эълон қилишмоқда.

“Она-табиат – кучли. У ҳеч нарсага қарамай, тикланмоқда”, деб изоҳ қолдиришган фойдаланувчилар ижтимоий тармоқларда.

Австралияда ўрмон ёнғинлари сентябрдан бошланиб, декабрь охирида ўз чўққисига етганди. Улар кузатувлар тарихидаги энг вайронкор ёнғинлар бўлди. Ёнғин 20 млн гектар ернинг кулини кўкка совурган. Ёнғинлар 25 кишининг ва миллиардан кўпроқ жонзотнинг ҳалокатига олиб келган. Мутахассисларнинг баҳолашича, яшил қитъага тикланиш учун 100 йилга яқин вақт талаб этилади.

Январь ўрталарида мамлакатда бошланган кучли ёғингарчилик ўрмон ёнғинлари тугашига ёрдам берган.