Ўзбекистон Россиядан 4 та Ми-35М жанговар вертолёти олди

Ўзбекистон мудофаа вазирлиги Россиядан 4 та Ми-35М транспорт-жанговар вертолёти олди. Вертолёт зирҳли техникани йўқ қилиш ва қуруқликдаги қўшинларни ўт очиш билан қўллаб-қувватлаш учун мўлжалланган    

Бу ҳақда “Новости Ташкентского Неба” Telegram-каналида маълум қилинган. Таъкидланишича, вертолётлар ҳозирда Тошкент халқаро аэропорти тураргоҳида турибди.   

Аввалроқ “Новая газета” нашри 2019 йил 4-чорагида Ўзбекистонга 4 та, 2020 йилда эса яна 8 та Ми-35М вертолёти етказиб берилишини маълум қилган. 

Россиянинг ҳарбий-техник ҳамкорлик бўйича федерал хизмати маълумотларига кўра, вертолётлар Ўзбекистонга 2017 йилда тақдим қилинган давлат экспорт кредити бўйича етказиб берилган.  

Ми-35М юқори аниқликдаги замонавий қурол билан қуролланган ва турли об-ҳаво шароитларида кун бўйи жанговар вазифаларни бажара олади. Шунингдек, вертолётлардан ҳарбийлар ва техникани ташишда фойдаланиш мумкин.