Туркиядаги йирик саноат концернларидан бири Ўзбекистонга инвестиция киритмоқчи

Бугун, 20 февраль куни Туркиянинг Анқара шаҳрида Ўзбекистон президенти Шавкат Мирзиёевнинг турк ишбилармон доиралари ва компания раҳбарлари билан учрашуви бўлиб ўтмоқда.

Учрашувнинг биринчи қисмида президент Шавкат Мирзиёев Ўзбекистонда инвесторлар учун қонуний асосда яратиб берилаётган шароитлар ҳақида гапирган бўлса, дастур бўйича иккинчи қисмда туркиялик тадбиркорлар ўз лойиҳалари бўйича тақдимот ўтказишмоқда.

Учрашувда тақдимот қилган «Eczacıbaşı group» компанияси бошқарув кенгаши раиси Булент Экзачибаши компания 2017 йилдан буён Ўзбекистондаги бизнес муҳитини диққат билан кузатиб келаётганини таъкидлади.

«Жаноб президент, сиз жаноби олийлари томонидан Ўзбекистонни нафақат Марказий Осиёда, балки бутун дунёда инвесторлар учун жозибадор давлат сифатида танитиш йўлида қилаётган ишларингиздан яхши хабардорман.

Мен раҳбарлик қилаётган компания 80 йиллик тарихга эга. Бу 40дан ортиқ йўналишда фаолият юритувчи компания ҳисобланади.

Компаниямиз темирдан бошқа қимматбаҳо металлар (мис, олтин, кумуш, қўрғошин) қазиш ва уни ишлаб чиқариш учун хомашё топиш қурилмаларини ишлаб чиқаради.

Биз Ўзбекистон билан ҳамкорлик қилмоқчимиз ва бу борадаги ишларни тезроқ бошламоқчимиз.

Бундан ташқари, санитар керамика маҳсулотларини ишлаб чиқариш бўйича давлатингизга инвестиция киритмоқчимиз», дея Экзачибашининг сўзларини келтирмоқда Kun.uz мухбири.

Шавкат Мирзиёев ушбу тадбиркорнинг Ўзбекистонда бизнес бошлаши учун керакли шароитлар яратиб берилишини маълум қилди ва бу масала бўйича ўз маслаҳатчиси Равшан Ғуломовга керакли топшириқлар берилганини айтди.

«Тошкентга борганингиздан кейин ҳеч қандай бюрократияларсиз иш бошлашингиз мумкин. Бошлаш керак Ғуломов, ҳаракатни бугундан бошлаш керак», деди президент Шавкат Мирзиёев.

Маълумот учун, 42та компанияни ўзида бирлаштирувчи «Eczacıbaşı» гуруҳи Туркиядаги йирик саноат концернларидан бири ҳисобланади. Умумий айланмаси 3,1 млрд АҚШ долларига тенг ва 12,5 мингта ходимга эга.