15 сентябр куни Ўзбекистон президенти Шавкат Мирзиёев ва Корея Республикаси бош вазири Хан Сон Сук қўшма бизнес форумининг очилишида иштирок этди.

Тадбирда икки мамлакат давлат тузилмалари ва ишбилармон доираларининг 300 нафардан зиёд вакили, жумладан, етакчи молия институтлари, йирик саноат корхоналари ва савдо компаниялари раҳбарлари қатнашди.

Корея томонидан Lotte Chemical, Hyundai Motor Group, Samsung C&T, CJ Group, Shinhan Financial Group, Hyundai Rotem, KIND, BOMI, Kia Corporation, Sampyo Group ва Hansae Mobility каби компаниялар вакиллари иштирок этди.

Шавкат Мирзиёев Ўзбекистон индустриал ва технологик тараққиётнинг янги босқичига қадам қўяётганини таъкидлаб, ўзаро савдо ҳажмини ошириш, инвестициявий ҳамкорликни кенгайтириш ва янги қўшма лойиҳаларни амалга ошириш учун кенг имкониятлар мавжудлигини қайд этди.

Президент Ўзбекистоннинг ресурс салоҳияти, Кореянинг илғор технологиялари ва икки мамлакат компанияларининг инвестициявий имкониятларини бирлаштириш орқали янги иқтисодий ўсиш нуқталарини яратишни таклиф қилди.

Иқтисодий шерикликни ривожлантиришнинг устувор йўналишлари сифатида саноат кооперацияси ва тўлиқ ишлаб чиқариш занжирларини шакллантириш, энергетика ва «яшил иқтисодиёт», транспорт ва замонавий инфратузилма, рақамлаштириш ва сунъий интеллект белгиланди.

Шунингдек, яримўтказгичлар ва микроэлектроника, биотехнология ва фармацевтика, қўшма илмий тадқиқотлар, илғор технологияларни жорий этиш ва кадрлар тайёрлаш бўйича ҳамкорликни кенгайтириш таклиф қилинди.

Корея компаниялари Ўзбекистонда мисни қайта ишлаш, электротехника ускуналарини ишлаб чиқариш, автомобиль ва электромобил саноати учун бутловчи қисмларни маҳаллийлаштириш, робототехника ва автоматлаштириш соҳаларида лойиҳаларни амалга оширишга чақирилди.

Бундан ташқари, биотехнология ва фармацевтика, гидроэнергетика, энергияни сақлаш тизимлари, энергетика тармоқларини модернизация қилиш, транспорт ва шаҳар инфратузилмасини ривожлантириш бўйича лойиҳалар таклиф этилди.

Саноат-технологик ҳамкорликни янада чуқурлаштиришнинг амалий механизми сифатида Ўзбекистон – Корея саноат-технологик алянсини тузиш ташаббуси илгари сурилди.

Президент Ўзбекистонда Корея бизнеси учун янада қулай шарт-шароитлар яратиш ва қўшма лойиҳаларни амалга оширишда амалий кўмак кўрсатишга тайёрлигини билдирди.