Самарқанд шаҳрида “Имом Абу Мансур Мотуридий ва мотуридия таълимоти: ўтмиш ва бугун” мавзуида халқаро конференция бошланди, дея хабар бермоқда Kun.uz мухбири.
Ушбу конференцияда дунёнинг йигирмага яқин мамлакатидан олимлар, диний уламолар иштирок этмоқда.
Хусусан бугун, тадбирнинг биринчи кунида Форумлар саройида халқаро конференциянинг ялпи йиғилиши бўлиб ўтиши кутилмоқда.
Украина бош имом хатиби, муфтийси Аҳмад Тамим конференциянинг аҳамияти ҳақида тўхталиб, қуйидагиларни гапирди:
“Мазкур конференцияда қатнашиш барча мусулмонлар қатори мени ҳам хурсанд қилмоқда. Айтиш лозим, Имом Абу Мансур Мотуридийнинг ислом дини равнақига қўшган ҳиссаси беқиёсдир. У зот Самарқанднинг Мотурид қишлоғида туғилиб ўсган, ҳадис ва фиқҳ илмининг равнақига улкан ҳисса қўшган. Имом Мотуридий нафақат Марказий Осиёда, балки бутун ислом оламида ўз муносиб ўрнига эга бўлган диний арбоблардан ҳисобланади. Чунки, аллома яшаган даврда, ислом динида турли гуруҳ ва фирқалар сони кўпайиб кетганлиги сабабли кўплаб ихтилофлар келиб чиққан. Ана шундай вазиятда Имом Мотуридий ислом диннинг асл моҳиятини очиб бериш, соф исломий ақидани сақлаб қолиш борасида беқиёс ишларни амалга оширган. Мазкур тадбир буюк имомнинг илмий меросини ўрганиш ва кенг тарғиб этишда муҳим аҳамият касб этишига ишонаман”.
Конференция қатнашчилари бугун “Мотуридия таълимоти ва ҳозирги замон” ҳамда “Замонавий давлат шароитида диний қадриятларни асраб-авайлаш ва ривожлантириш” мавзуида икки шўъбага бўлинган ҳолда фаолият олиб боради.
Эслатиб ўтамиз, халқаро конференция 5 мартга қадар давом этади.
