26 март куни G20’нинг тарихда биринчи марта виртуал тарзда ўтказилган саммити давомида “Йигирматалик”ка аъзо давлатлар коронавирус пандемияси ва у олиб келган иқтисодий инқирозни енгиш учун барча имкони бор ишни амалга оширишга келишиб олишди.
Гуруҳ томонидан қабул қилинган чоралар орасида ҳам иқтисодий, ҳам гуманитар масалалар бор.
Жумладан, “Йигирматалик” қуйидаги мақсадларда бор имкониятини ишга солади:
одамлар ҳаётини ҳимоялаш;
иш ўринлари ва аҳоли даромадлари даражасини сақлаб қолиш;
келажакка ишончни тиклаш, молиявий барқарорликни сақлаб қолиш, иқтисодий ўсиш ва унинг янада тезлашишини тиклаш;
савдо ва глобал ишлаб чиқариш-сотиш занжирларида узилишларни минималлаштириш;
кўмакка муҳтож барча давлатларга ёрдам кўрсатиш;
жамоатчилик саломатлиги ва молия соҳаларидаги чораларни мувофиқлаштириш.
“Биз тиббий мақсаддаги буюмларга эҳтиёжни қаноатлантириш учун ишлаб чиқариш қувватларини кенгайтирамиз ва бу буюмларнинг оммавий тарзда ишлаб чиқарилишини таъминлаймиз. Улар қаерга зарурроқ бўлса ўша ерга, иложи борича тезроқ ва ҳамёнбоп нархда тақсимланиши лозим”, дейилган хабарда.
G20’га аъзо давлатлар соғлиқни сақлаш вазирларига ўзаро илғор тажриба алмашиш ва пандемияга қарши кураш бўйича “Йигирматалик”нинг шошилинч ҳаракатлар мажмуасини ишлаб чиқиш вазифаси топширилган.
