Ўзбекистонда янги инвестиция компанияси ташкил этилади - Президент қарори лойиҳаси

Президентнинг “Давлат активларини бошқариш, хусусийлаштириш ва бўш турган объектларни хўжалик фаолиятига жалб этиш этиш юзасидан қўшимча чора-тадбирлар тўғрисида”ги қарори лойиҳаси муҳокама учун жойлаштирилди.

Ўзбекистон Республикаси Давлат активларини бошқариш агентлиги, Молия вазирлиги ва Иқтисодиёт ва саноат вазирлигининг:

давлат иштирокидаги корхоналарнинг инвестициявий жозибадорлигини таъминлаш учун сотишдан олдин тайёргарлик ишларини амалга ошириш ва салоҳиятли инвесторларга сотиш орқали хусусийлаштиришнинг муваффақиятли натижаларини таъминлаш бўйича акциядорлик жамияти шаклида “UzAssets” инвестиция компаниясини;

давлат эгалигида сақланадиган корхоналарда илғор корпоратив бошқарув амалиётини татбиқ этиш орқали уларни самарали бошқариш бўйича Корпоратив бошқарув Лойиҳа офисини;

фойдаланилмасдан турган объектлардан оқилона ва самарали фойдаланиш, уларни хўжалик фаолиятига жалб этиш орқали инвестициявий лойиҳаларини амалга ошириш бўйича давлат муассасаси шаклида Бўш турган объектлардан самарали фойдаланишни ташкил этиш маркази ташкил этиш тўғрисидаги таклифларига розилик берилиши мумкин.

Қуйидагилар:

а) “UzAssets” инвестиция компаниясининг асосий вазифалари этиб:

корхоналарни сотишдан олдин тайёрлаш, шу жумладан инвестициявий жозибадорлигини ошириш, бу борада самарали механизмларни жорий этиш бўйича хорижий, халқаро институтлар ва компаниялар билан самарали ишларни ташкил этиш;

корхоналар фаолиятини комплекс таҳлил қилиш (due diligence), инвестициявий “диагностика”сини ўтказиш, “бенчмаркинг” усулида таққослаш орқали ривожланиш прогноз кўрсаткичларини белгилаш;

корхоналарнинг даромадлилик нормасини халқаро амалиётдаги мезонлар асосида таҳлил қилиш (IRR, NPV, EBITDA ва бошқалар);

устав капиталига берилган акция пакетларини (улушларини) самарали бошқариш, корхоналарни ички ва ташқи бозорларда рақобатлаша оладиган (market oriented) корхоналарга айлантириш;

салоҳиятли инвесторларнинг рўйхатини шакллантириш (short-list);

инвестиция воситачиларини жалб этган ҳолда “Road Show” дастурларини ишлаб чиқиш ва мақсадли аудиториялар учун тақдимотлар ўтказиб борилишини ташкил этиш;

иқтисодиёт тармоқларини узоқ муддатли ривожлантириш мақсадларидан келиб чиқиб, устав капиталига берилган активларни салоҳиятли инвесторларга сотиш орқали барқарор ва муваффақиятли хусусийлаштиришни таъминлаш.

б) Корпоратив бошқарув Лойиҳа офисининг асосий вазифалари этиб:

давлат иштирокидаги корхоналарда илғор корпоратив бошқарув амалиётини татбиқ қилиш, бунда малакали хорижий мутахассисларни жалб этиш;

корхоналар Кузатув кенгашлари ва менежменти таркибига киритиш учун малакали экспертлар маълумотлар базасини шакллантириш;

халқаро тажрибага эга етакчи экспертларни корхоналар раҳбарлари, ходимлари ва консультантлари сифатида ёллашни ташкил этиш;

давлат иштирокидаги корхоналар самарадорлигини оширишга қаратилган самарадорликнинг муҳим кўрсаткичларини (KPI) ва мақсадли кўрсаткичларини ишлаб чиқиш;

корхоналарда молиявий ҳисоботни халқаро стандартлар асосида юритилишини ташкил этиш;

корпоратив бошқарув тизими даражасидаги диагностикани ўтказиш, ушбу асосда баҳолаш стандартларини ишлаб чиқиш ва рейтингини эълон қилиб бориш;

корхоналарнинг бошқарув органлари вакиллари учун менежментнинг илғор тажрибаси, жумладан рискларни бошқариш, ички назорат ва бошқа асосий йўналишлар бўйича тренинг, мастер-класс, семинар ва давра суҳбатларини ташкил этиш.

в) Марказнинг асосий вазифалари ва фаолияти йўналишлари этиб:

мулкчилик шаклидан қатъий назар барча тоифадаги бўш турган нотурар бино ва иншоотлар, фойдаланилмаётган ишлаб чиқариш майдонларини аниқлаш ва ҳисобини юритиш;

бўш турган объектларни мониторинг қилиш, уларнинг ишга туширилганлиги ҳисобини юритиш;

бўш турган давлат объектларидан самарали фойдаланишни ташкил этиш;

давлат мулкини ижарага бериш;

давлат мулки бўлмаган объектларни уларнинг мулкдорларининг ихтиёрига кўра ижарага беришда қатнашиш белгиланади.

Белгиланишича:

а) “UzAssets” инвестиция компаниясининг:

устав капитали Агентликнинг бюджетдан ташқари жамғармалари ҳисобидан 20,0 млрд. сўм миқдоридаги пул маблағлари ҳисобига шакллантирилади;

устав капиталига кейинчалик ўтказиладиган хусусийлаштирилиши белгиланган давлат улушлари номинал қийматда Агентликнинг буйруғи асосида амалга оширилади;

Кузатув кенгаши таркибининг камида 50 фоизи юқори малакали, халқаро тажрибага эга бўлган мутахассислардан иборат бўлади ва Агентлик директори ҳам киритилади;

устав капиталига берилган давлат улушлари унинг Кузатув кенгаши қарорига асосан бозор конъюнктурасидан келиб чиққан ҳолда, халқаро амалиётда кенг қўлланадиган тартибларга мувофиқ мустақил равишда сотилади;

устав капиталини шакллантириш учун бериладиган активлар қиймати унинг солиқ солиш базасида ҳисобга олинмайди;

ижро органининг раҳбарини тайинлаш тўғрисидаги қарор хорижий менежерлар ҳам иштирок этиши мумкин бўлган танлов асосида қабул қилинади;

соф фойдаси унинг Кузатув кенгаши томонидан тасдиқланган сақлаш харажатлари, жумладан корхоналарни сотишдан олдинги тайёрлаш билан боғлиқ харажатларни чегирган ҳолда, тўлалигича дивиденд сифатида Агентликка ўтказилади ва давлат активларини хусусийлаштиришдан тушган маблағлар сифатида ўрнатилган тартибда тақсимланади;

б) Корпоратив бошқарув Лойиҳа офисининг фаолияти Агентликнинг бюджетдан ташқари маблағлари ва давлат активларини хусусийлаштиришдан тушган маблағларни бюджетга йўналтирилиши белгиланган прогноз кўрсаткичларидан ортиқча тушган маблағлар ҳисобидан молиялаштирилади;

в) Марказ:

Агентликнинг Қорақалпоғистон Республикаси, вилоятлар ва Тошкент шаҳар ҳудудий бошқармалари ҳузуридаги “Давлат мулкини ижарага бериш маркази” давлат унитар корхоналари негизида ташкил этилади ва уларнинг барча ҳуқуқлари, мажбуриятлари ва шартномалари бўйича ҳуқуқий вориси ҳисобланади;

бўш турган давлат объектлари (инвестиция дастури асосида киритилган объектлар бундан мустасно) сақлаш ва улардан келгусида самарали фойдаланиш учун балансда сақловчилар томонидан Марказ ва унинг ҳудудий бошқармалари тасарруфига топширилади;

ўзига юклатилган ваколатларга мувофиқ судларга кўриб чиқиши учун ўзи ва ҳудудий бошқармалари томонидан киритиладиган даъволар бўйича давлат божи тўлашдан озод қилинади;

Ўзбекистон Республикаси давлат бюджети, давлат мулки ижарасидан тушадиган маблағлар, Агентликнинг бюджетдан ташқари жамғармаси маблағлари ва қонун ҳужжатлари билан таъқиқланмаган бошқа манбалар ҳисобига молиялаштирилади;

Марказ директори лавозими бўйича Агентликнинг директори ўринбосари лавозимига тенглаштирилади.