Давлат активларини бошқариш агентлиги директори Соҳибжон Муродов Ўзбекистондаги кўплаб нефт конларининг “Саноат энергетика гуруҳи” (Saneg) тасарруфига қандай асосда ўтказилганига изоҳ берди. Маълум бўлишича, бу конларга берилган лицензиялар бекор қилинган.

8 октябр кунги матбуот анжуманида Kun.uz мухбири мамлакатдаги стратегик аҳамиятга эга нефт конлари нима сабабдан очиқ савдоларсиз хусусий компанияга берилгани ҳақида сўради.

Муродовнинг тушунтиришича, нефт конларининг ўзи хусусийлаштирилмаган, Saneg'га фақат ер қаъридан фойдаланиш ҳуқуқини берувчи лицензиялар тақдим этилган.

“Конларнинг ўзи хусусийлаштирилмайди, чунки улар табиий ресурс ҳисобланади. Бизда ер қаъридан фойдаланиш ҳуқуқи берилади, яъни лицензия ажратилади. Saneg компаниясига ҳам айнан ер қаъридан фойдаланиш ҳуқуқини берувчи лицензиялар тақдим этилган. Бундай амалиёт бошқа компанияларда ҳам мавжуд”, — деди агентлик директори.

Соҳибжон Муродовнинг айтишича, илгари ер қаъридан фойдаланиш ҳуқуқини берувчи лицензияларни олиш тартиби ҳозиргидан фарқ қилган. Вазирлар Маҳкамасининг 133-сон қарори билан тасдиқланган низомга мувофиқ, аввалги амалиётда ер қаъри участкасидан фойдаланиш учун биринчи бўлиб мурожаат қилган шахс белгиланган тўловларни амалга ошириш орқали лицензия олиши мумкин бўлган.

Кейинчалик бу тартиб ўзгартирилиб, углеводород конларидан фойдаланиш ҳуқуқини ауцион орқали бериш механизми жорий қилинган.

“Аввалги амалиётда кон бўйича лицензия олиш учун биринчи мурожаат қилган шахс қонунчиликда белгиланган тўловни амалга ошириб, ер қаъридан фойдаланиш ҳуқуқини олиши мумкин эди.

Кейинчалик янги амалиёт киритилди. Углеводородлар бўйича ҳам лицензия бериш ҳуқуқи ауционга ўтказилди. Бу тартиб 2023–2024 йиллардан бошлаб жорий этилди. Унгача лицензияларни тўғридан тўғри олиш амалиёти мавжуд бўлган”, – деди Давактив раҳбари.

Унинг айтишича, ҳозирда бу лицензиялар бекор қилинган.

“Менга маълум бўлишича, лицензия олинган конлар хўжалик айланмасига киритилмагани ва лицензия шартлари бажарилмагани сабабли бугунги кунда бу лицензиялар бекор қилинган.

Ҳозир Геология вазирлиги томонидан ушбу конлардан самарали фойдаланиш бўйича чора-тадбирлар ишлаб чиқилмоқда”, – деди агентлик раҳбари.