Боснияда карантин енгиллаштирилгандан кейин коронавирусга чалиниш ҳолатлари кескин кўпайиб кетди

Бу ҳақда Reuters ахборот агентлиги хабар берди.  

Расмий маълумотларга кўра, 29 апрелда коронавирусга чалиниш бўйича 93 та янги ҳолат ва 2 та ўлим қайд этилган. Ваҳоланки, бир кун аввал коронавирусга чалиниш ҳолатлари 20 тани, 27 апрелда эса 49 тани ташкил қилган.  

Умуман олганда пандемия бошидан бери мамлакатда 1677 та касалланиш ҳолати ва 65 та ўлим қайд этилган.  

Мамлакат таркибига кирувчи Серб республикасининг ўзида 49 та янги касалланиш ҳолати қайд этилган ва расмий шахслар фуқароларни оммавий йиғилишлардан қочишга ҳамда доимий равишда ниқоб тақиб юришга чақиришмоқда.

27 апрелда мухтор вилоятда кекса кишиларга уйдан 3 соатга чиқишга, баъзи корхоналарга фаолиятини тиклашга рухсат берилган.

Яна бир мухтор вилоят - Босния ва Герцеговина федерациясида 24 апрелдан бошлаб тунги комендантлик соати бекор қилиниб, кесалар ва болаларга кунаро бир неча соатга уйдан чиқишга рухсат берилганди.

Босния ва Герцеговинада коронавирус тарқалиши олдини олиш учун бир қатор чекловлар киритилганди. Жумладан, кексалар ва болаларга уйларини тарк этиш тақиқланганди. Кейинроқ суд бу чекловлар конституцияга зидлиги ҳақида қарор чиқарган.