Жонс Ҳопкинс университети маълумотларига кўра, ҳозирги вақтда дунё бўйича 16,7 млн киши коронавирус билан касалланган, 660,5 минг киши ҳаётдан кўз юмган.
АҚШ иккала кўрсаткич бўйича ҳам етакчи - мос равишда 4,3 млн ва 149,2 минг ҳолатлар. Иккинчи ўринда 2,4 млн бемор ва 88,5 минг ўлим ҳолати қайд этилган Бразилия бормоқда.
Европада касалланишнинг янги тўлқини
Европанинг кўплаб давлатларида кузатилаётган касалланиш даражаси ўсиши ҳукуматларни Евроиттифоқнинг ички ва ташқи чегараларини ёпиш эҳтимоли ҳақида бош қотиришга мажбур қилмоқда.
Аммо Франция соғлиқни сақлаш вазири Оливье Вераннинг огоҳлантиришича, бунинг олдини олишга ҳар қандай йўллар билан ҳаракат қилиш лозим. У шунингдек, мамлакатда қайта локдаун жорий этилишини истамаслигини, аммо вирус билан кечаётган кураш, унинг сўзларига кўра, ҳали тугайдиганга ўхшамаётганини маълум қилди.
Ҳокимият вакиллари вирус жиддий авж олган муайян минтақаларда маҳаллий локдаун жорий этаётган Испанияда касалланишнинг кескин ортиши кузатилмоқда. Британия Испаниядан келувчилар учун икки ҳафталик мажбурий карантин тартибини йўлга қўйди, ваҳоланки ушбу давлатлар ўртасида ҳаво йўлагини ташкил этиш бўйича битим имзоланганди.
Ушбу ҳафта бошида Испания бош вазири Педро Санчес Британиянинг бу қарорини ҳаддан ортиқ деб баҳолади ва қироллик ҳукумати чекловларни қайта кўриб чиқишига умид билдирди. Унинг сўзларига кўра, Испания ҳудудининг катта қисмида Covid-19'дан касалланиш даражаси Британияникига қараганда паст.
Германия олимлари Covid-19'га қарши вакцина кейинги йил ўрталаригача тайёр бўлмайди деб ҳисобламоқда. Бу мамлакат эпидемия билан нисбатан самарали курашган давлатлар қаторига киради. Бироқ соғлиқни сақлаш вазири Йенс Шпаннинг айтишича, у касалланиш статистикаси кескин юқорилаган сўнгги кунларда қаттиқ хавотирга тушмоқда. Жонс Ҳопкинс университети маълумотларига кўра, Германияда касалланиш ҳолатларининг умумий сони 208 мингтани ташкил этиб, 9,1 минг киши коронавирус туфайли ҳаётдан кўз юмган.
Беларусь президенти Александр Лукашенко коронавирус билан «оёқда юриб» курашгани ҳақида айтди. У вирус юқтириб олганини тан олган, аммо касаллик аломатларсиз кечган. Унинг фикрича, вирус аҳолининг 97 фоизида шу тарзда ўтиб кетади, эпидемия туфайли хавотир ошишини эса психоз деб атади. Беларусда пандемия бошидан бери 67,3 минг бемор қайд этилгани, улардан 543 нафари ҳаётдан кўз юмгани маълум қилинган.
Руминия ҳукумати ҳам Covid-19'нинг янги тўлқини фонида қоидаларни қатъийлаштирмоқда: жамоат жойларида ниқобда бўлиш мажбурий, бар ва бошқа бир неча идоралар иш соатига чеклов ўрнатилади. Мамлакатда эпидемия бошлангандан бери умумий касалланиш ҳолатлари 47 мингтани ташкил этиб, ўлим кўрсаткичи 2,2 минг киши. Бу Европа давлатлари орасида энг қуйи кўрсаткичлардан биридир, аммо сўнгги ҳафтада кунига мингдан ортиқ киши коронавирус юқтириб олаётгани аниқланяпти.
