АҚШнинг Тинч океани минтақаси шимоли-ғарбий нуқтаси Сиэтл шаҳрининг мэри 1 сентябр кунини Ўзбекистон мустақиллиги байрами сифатида нишонловчи ҳужжатни имзолаганди. Пойтахт Вашингтон мэри Мириел Баузер ҳам фармойишга қўл қўйиб, шаҳарда 1 сентябрни мустақиллик куни дея эълон қилди.
Имзоланган декларацияда мустақиллик кунининг аҳамияти, АҚШнинг эса Ўзбекистон мустақиллигини биринчилардан бўлиб тан олгани кўрсатиб ўтилган.
“Бу йили Республика ўз мустақиллигининг 35 йиллигини нишонлайди. Ушбу сана ҳар йили 1 сентябрда байрам қилиниб, ўзбек халқининг бой маданий мероси, эришган ютуқлари ҳамда халқаро ҳамжамиятдаги нуфузини эътироф этади”, дейилади мэр имзолаган ҳужжатда.
Мириел Баузер фикрича, АҚШдаги элчи Фурқат Сидиқов бошчилигидаги дипломатик корпус Вашингтон билан яқиндан ҳамкорлик қилиб, шаҳарнинг таълим соҳасидаги ва маданий хилма-хиллигини ривожлантиришга ҳисса қўшиб келмоқда.
“Биз бутун дунёдаги ўзбек жамоатчилиги билан биргаликда Ўзбекистон мустақиллигини нишонлар эканмиз, дўстлик, умумий эзгу мақсадларни қадрлаймиз. 2026 йилнинг 1 сентябри Вашингтон ва Колумбия округида “Ўзбекистон мустақиллиги куни” деб эълон қилинади”, дейилади мэрнинг декларациясида.
