«Ишонч билдиришни хоҳлашмаганди». Рустам Ашурматов Кореядаги фаолияти, миллий жамоадаги ўрни ва қўпол футболчи эмаслиги ҳақида

Жанубий Корея чемпионати янги мавсумини K лигада бошлаган ўзбекистонлик ҳимоячи Рустам Ашурматов клуби «Кванжу» билан дебютант саналса-да турнирда ёмон таассурот қолдирмаяпти. Куни кеча Tribuna.uz мухбири Рустам Ашурматов билан боғланиб, хориждаги фаолияти, миллий жамоадаги келажаги ва қатор мавзуларда суҳбатлашди.

- Рустам, суҳбатимизни охирги турда қизил карточка олганингиздан бошласак. Бу қандай содир бўлди? Умуман ўзингизни қўпол ўйинчи деб ҳисоблайсизми?

- Охирги ўйинимда ҳакам томонидан икки марта огоҳлантирилганимдан кейин майдондан четлатилдим. Шунга қарамай, ўзимни қўпол футболчи деб ҳисобламайман. Сабаби охирги 12та ўйинимда умуман карточкага лойиқ кўрилмагандим. Умуман олганда, бу қизил карточка фаолиятимда биринчиси ва умид қиламанки охиргиси бўлиб қолади. Ҳимоячи эканлигим боис карточка бўлиши табиий, деб ўйлайман.

- Корея чемпионати пандемия ҳолатида бошланган дастлабки лигалардан бири бўлди. Бундай шароитда чемпионатда жорий қилинган жуда кўп янги қоидаларга амал қилиш осон бўлмагандир?

- Тўғри, Жанубий Корея лига старт олган илк давлатлардан бири бўлди. Очиғини айтсам, майдондаги ўйинлар давомида бу борада муаммо бўлгани йўқ, аммо майдон ташқарисида одатий ҳаёт эмас, чекловлар кўп эканлиги боис эҳтиёт чораларига қатъий амал қилишга интилаяпмиз.

- Клубингиз имкониятлари қай даражада? Қўйилган вазифалар уддаланадими?

- Чемпионат дебютанти эканлигимиз сабабли энг аввало лигада қолиш вазифаси қўйилганди. Аммо ҳозирда 9-ўринда эканлигимиз боис, энди олдимизга камида кучли олти жамоа орасида бўлиш мақсади қўйилган. Аммо бу осон бўлмайди. Чунки фақат биз эмас, яна 3-4 жамоа ҳам шу топ-6ликка киришга имконияти бор. 1-5-ўриндаги клублар бошқалардан узоқлашган бўлса, 6-ўриндан қуйи ўринларгача бўлган клубларда олтиликдан жой олиш имкони бор.

- Корея чемпионатида тўп сураётганингизга иккинчи йили ўтмоқда. Ўзингизга маъқулми? Умуман шартномангиз қайси йилгача тузилган?

- Дастлабки мавсумда қуйи лигада ўйнаб ғолиб бўлгандик, бу йил юқори дивизионда тўп сураяпман. Лигада кучли легионерлар анча кўп. Ҳар турда савияли футболчиларга қарши майдонга тушиб, ўйинчи сифатида ўсишга эриша олдим деб ҳисоблайман. Лекин янада ўсиш учун кучлироқ чемпионат ва кучлироқ клубларга ўтиш ниятим ҳам бор. Икки йиллик шартномам шу мавсум якунида тугайди. Ўшандан кейин клуб билан маслаҳатлашиб, фаолиятимни қаерда давом эттиришимни аниқлаб оламан.

- Сўнгги йилларда Кореяда ўзбекистонлик ўйинчилар анча кўпайиб қолди. Бу ҳолатнинг асосий сабаби нима деб ўйлайсиз?

- Тўғри айтдингиз, мен ва Икром Алибоевдан олдин Шоҳрух Гадоев, Санжар Турсунов ҳам Кореяда тўп сураётган эди. Лекин улар ҳозир қайтишган. Фикримча, Гадоев, Турсунов, Алибоев сингари футболчиларимиз бу ерда ўзларини кўрсата олаётгани сабабли ўзбекистонлик бошқа футболчиларга ҳам Корея лигаларида эшиклар очилмоқда. Легионерларимиз қайси давлатда ўзларини ижобий жиҳатдан кўрсата олишса, ўша чемпионатда ўзбекистонлик футболчиларга нисбатан қизиқиш ошади.

- Бутун дунё пандемия ҳолатида. Инсоният ушбу балога қарши курашмоқда. Корея давлатида вазият қандай?

- Бу ерда ҳам вазият бошида қийин эди. Кейинчалик бу ерда ҳам аҳвол барқарорлашди. Билишимча, ҳозирда ҳамма одатий ҳаёт тарзи билан банд. Кўчаларда одамлар гавжум, ҳеч қандай катта муаммо йўқ. Жиддий қўрқишга сабаб қолмаган. Тўғри, касаллик учраб турибди, аммо аввалги даражада эмас. Бу пандемиядан нафақат Корея, Ўзбекистонимиз ҳам тезроқ қутулишини тилаб қоламан.

- Эктор Купер миллий жамоага келганда адашмасам, илк йиғинларга сизни ҳам таклиф қилганди. Нима деб ўйлайсиз, сиз ўша пайт футболчи сифатида миллий жамоа даражасига тўғри келмасмидингиз ёки Купер ишонч билдирмадими?

- Савол бироз хато бўлди, чунки Эктор Купер бирор марта мени миллий жамоага чақирмаган эди. Нафақат ишонч билдирилмади, ишонч билдиришни хоҳлашмаганди. Бундан хафа эмасман, балки унинг қарашларига тўғри келмаган бўлишим мумкин.

- Абрамов ўтган йил сизни бир нечта ўйинларда бошланғич таркибга киритди. Сизни миллий жамоада ўз ўрнини топди, десак бўладими?

- Вадим Карленович баъзи ўйинларда майдонга туширган эдилар. Аммо бу миллий жамоада ўз ўрнимни топдим, дегани эмас. Вадим Абрамовни ҳар бир интервьюларини кузатиб бораман, ўзбекистонлик ҳар қандай футболчида миллий жамоада тўп суриш имконияти борлигини доим такрорлайдилар. Шундай экан, ҳар биримизда имконият бўлади. Худо хоҳласа ўйинларим орқали миллий жамоада ўз ўрнимга эга бўла олишимни исботлайман, деган умиддаман.

- Сизнингча, Қатар-2022га бориш имкониятларимиз қай даражада?

- Жаҳон чемпионатига бориш имкониятимиз бор. Ҳар бир баҳсда ғалабага эришсак, Қатарга бориш имкониятимиз бўлади. Бу қўлимиздан келишига ишонаман. Узоқ кутилган орзуимиз амалга ошиши керак.

- Европа футболини қанчалик кузатиб борасиз? Сиз мухлислик қиладиган клуб ва футболчи борми? Қайси мураббий қўл остида ўйнаган бўлардиз?

- Очиғини айтсам, Европа футболини тўлиқ кузата олаётганим йўқ. Асосан интернет орқали ҳисобларни билиб бораман. Сабаби Европада ўйинлар ўтказилаётганда Кореяда вақт ноқулайроқ бўлган, эрталабки соат 4-5 бўлади.

Ўзим «Реал» клуби мухлисиман. Серхио Рамоснинг ўйинлари ёқади. Жаҳоннинг етакчи ҳимоячилари ўйинини кузатиб, улардан нимадир ўрганишга ҳаракат қиламан.

Айнан қайсидир мураббий қўл остида тўп суриш ҳақида ўйламаган эканман. Аммо келажакда шундай мураббийлар бошқарувида ишлаш ниятим бор.

- Шахсий ҳаётингизда нима гаплар? Рустам Ашурматов 30 кишилик тўй қилиб уйланиши мумкинми?

- Шахсий ҳаётимда деярли янгилик йўқ. Сабаби ўзим Кореядаман, оиламдагилар эса Тошкентда. Агар мавсум якунигача пандемиядан тўлиқ халос бўла олмасак, айтганингиздек, Ўзбекистонга қайтиб 30 кишилик тўй билан ҳам уйланишим мумкин. Ҳаммасини вақт кўрсатади.

Жамолиддин Бобожонов суҳбатлашди.