Фармонга кўра, Ўзбекистон Республикаси фуқаросининг идентификация ID-картаси тўғрисидаги ва Ўзбекистон Республикасида доимий яшовчи чет давлат фуқароси ва фуқаролиги бўлмаган шахснинг идентификация ID-картаси тўғрисидаги низомлар тасдиқланган.

Ўзбекистон Республикаси фуқаросининг идентификация ID-картаси тўғрисидаги низомда қайд этилишича, ID-карта Ўзбекистон Республикаси мулкидир ва унинг эгаси Ўзбекистон Республикаси ҳимоясидадир.

ID-карта маълумотларни йиғиш пункти томонидан фуқароларга қуйидаги муддатларга берилади:

  • янги туғилган болага бир ёшгача – икки йил муддатга (ота-оналар, васийларнинг (ҳомийларнинг) ихтиёрига кўра);
  • бир ёшдан 16 ёшгача – 5 йил муддатга (ота-оналар, васийларнинг (ҳомийларнинг) ихтиёрига кўра);
  • 16 ёшдан – 10 йил муддатга.

Қатъий ҳисобга олинадиган ҳужжат ҳисобланувчи ID-карта белгиланган намуна бўйича лотин алифбосидаги ўзбек тилида, Қорақалпоғистон Республикаси учун эса — ID-карта олиш учун мурожаат қилган фуқаронинг хоҳишига кўра лотин алифбосидаги қорақалпоқ ёки ўзбек тилларида персоналлаштирилади.

ID-карта бланкасига қуйидаги асосий маълумотлар киритилади:

а) ҳужжатнинг номи;

b) ID-картанинг рақами;

c) ID-карта эгасининг:

  • фамилияси, исми, отасининг исми;
  • туғилган санаси;
  • фуқаролиги;
  • туғилган жойи;
  • жинси;
  • жисмоний шахснинг шахсий идентификация рақами;

d) ID-картанинг:

  • берилган санаси;
  • ким томонидан берилгани;
  • амал қилиш муддати тугайдиган сана;

e) ID-карта эгасининг рақамли сурати.

ID-картада унинг эгасининг имзоси бўлиши шарт (16 ёшга етганидан кейин).

Вазирлик ва идораларнинг автоматлаштирилган тизимлари орқали ID-карта эгасининг розилиги билан давлат хизматларини кўрсатишда ID-картага киритилган маълумотлардан фойдаланишга рухсат этилади.