Россиянинг коронавирусга қарши вакцинаси болаларда синаб кўрилади

Гамалея номидаги марказ директори Александр Гинцбург яқин вақт ичида «Спутник V» деб номланувчи коронавирусга қарши вакцина болаларда синаб кўрилиши мумкинлигини айтди.

 Унинг сўзларига кўра, вакцина кўнгиллиларга бурун орқали юборилади. Гинцбургнинг қайд этишича, клиник синовларда дастлаб катта ёшли болалар қатнашади, сўнгра кўнгиллиларнинг ёши пасайиб боради.

Аввалроқ Ўзбекистон Соғлиқни сақлаш вазирлиги коронавирусга қарши вакцина билан эмлаш жараёнида иштирок этиш учун олиб бораётган ишлар тўғрисида маълумот берганди.

Маълум қилинишича, Ўзбекистон Хитой ва Россияда учинчи босқич синовлари ўтказилаётган вакциналарни харид қилиш имкониятларини кўриб чиқмоқда.

Хусусан, Россия Федерациясида ишлаб чиқарилаётган «Спутник-V» вакцинасининг 5000 дозасини Ўзбекистон Республикасига ажратиш юзасидан Россиянинг тўғридан тўғри инвестициялар жамғармасига мурожаат қилинган.

Россияда «Спутник V» вакцинаси 15 августдан ишлаб чиқарила бошланган.