Кўпинча «Ўзбектелеком» AКга интернет тезлиги бўйича жаҳон рейтингида Ўзбекистоннинг мавқеини яхшилаш тўғрисида ўқиганлари ҳақида савол беришади. Шу билан бирга, муштарийлар тарифлар ўзгариши секин бўлаётганини, хизмат тезлиги эса деярли ортмаётганини ёзадилар. Сизга тарифлар қандай пасайтирилганлиги ва интернет хизматларини тақдим этиш тезлиги қанчалик ортганлигини аниқ мисолларда кўрсатиб беришга ҳаракат қиламиз.
«Ўзбектелеком» AК томонидан 2018-2020 йилларда Ўзбекистонда интернет тармоғига кенг полосали уланиш хизматларини ривожлантириш бўйича катта ишлар олиб борилди. Шу жумладан, оператор ва провайдерлар учун 2018 йилдан 2020 йилгача ташқи интернет канал нархи 244,9 минг сўмдан 45 минг сўмгача, яъни 5 баробардан кўпроққа арзонлаштирилди.
Шу билан бирга, республиканинг операторлари ва провайдерлари учун CDN серверларидан фойдаланиш имконияти бўлган UZ-IX тармоғининг пиринг тармоғи хизматлари учун махсус тарифлар ишлаб чиқилган ва бу орқали операторлар ва провайдерлар ўз абонентларига маҳаллийлаштирилган интернет хизматларини тақдим этиш имконини беради. Шуни таъкидлаш жоизки, белгиланган нархлар халқаро пакетли коммутация маркази орқали халқаро интернет-канал хизматлари нархидан сезиларли даражада, яъни 2-3 баравар паст ва бу пиринг тармоғига уланган республика оператор ва провайдерлар учун ўз абонентларига жаҳон даражасидаги яхши хизматларини тақдим этиш имконини беради.
Компаниянинг интернет хизматларидан кенг фойдаланиш имкониятини оширишга қаратилган тариф сиёсати натижасида, кўрсатилган давр оралиғида тезликни сезиларли даражада ошириш ва хизмат нархини туширишга эришилди.
Мисол учун, агарда жисмоний шахс сифатидаги абонентларга 2018 йилда 350 минг сўм эвазига 4 Мбит/с тезликда интернетдан чексиз фойдаланиш имконияти тақдим этилган бўлса, бугунги кунга келиб ушбу тезликдаги интернет хизмати 88 минг сўм эвазига тақдим этилмоқда. Уланиш тезлиги бўйича таққосласак 2018 йилда 200 минг сўм эвазига 2 Мбит/с тезликда интернет хизмати тақдим этилган бўлса, ҳозирда 199 минг сўм эвазига 30 Мбит/с тезликда интернет хизматларидан фойдаланиш мумкин.
Шу тарзда Интернет хизматлари нархи ўртача 4 баробарга пасайтирилган бўлса, уланиш тезлиги 15 баробарга оширилди.
Таъкидлаш жоизки, ҳозирда тунги вақтда интернет тармоғидан фойдаланиш тезлиги, шунингдек UZ-IX ва Tas-IX тармоғига уланиш тезлиги сезиларли даражада оширилди. Aвваллари ушбу тармоқлар хизматларидан фойдаланиш тезлиги интернет тармоғига уланиш тезлиги билан бир хил бўлган бўлса, ҳозирда тариф режаси ва уланиш технологиясига қараб 300 Мбит/с гача оширилди.
