Ўзбекистонда капитал бозор капиталлашуви ЯИМнинг 1 фоизига тенг

Ўзбекистон капитал бозори капиталлашуви мамлакат ЯИМга нисбатан 1 фоизни ташкил этади. Бу ҳақда Капитал бозорини ривожлантириш агентлиги директори Отабек Назиров парламентда ташкил этилган семинарда маълум қилган. 

Назировнинг айтишича, ривожланаётган давлатларда бу кўрсаткич 30-60 фоиз атрофида бўлиб, ривожланган давлатларда 100 фоиз ва ундан ҳам ортиқни ташкил этади.

«Буларнинг бари бу соҳада изчил ислоҳотлар ўтказилишини тақозо этади. 2025 йилга қадар эркин муомаладаги қимматли қоғозлар ҳажмини мамлакат ЯИМга нисбатан 10 фоизга етказиш кўзда тутилган», — дея маълумот берган Назиров.

Семинарда қудратли молиявий тизимни шакллантириш зарурати ҳақида айтилган: бундай тизим иқтисодиётга маблағ жалб қилишнинг асосий манбаи сифатида давлатга бўлган босимни камайтириш имконини беради.

«Иқтисодиётнинг ва биринчи навбатда хусусий секторнинг барқарор тараққиётини таъминлаш учун маҳаллий молия бозорининг яхлит тизимини шакллантириш лозимлиги таъкидланди. Иқтисодий ўсишни молиялаштириш учун капитални сафарбар қилиш ва уни самарали тақсимлашга бутун молиявий бозорни комплекс ислоҳ қилиш ва ўзаро мувофиқ тарзда ривожлантириш орқалигина эришиш мумкинлиги кўрсатилди», — дейилади парламент ахборот хизмати тарқатган хабарида.

2019 йил якунлари бўйича Ўзбекистон ялпи ички маҳсулотининг (ЯИМ) ўсиши 5,5 фоизни ташкил этиб, аҳоли жон бошига ЯИМ 1741 долларга етганди.

Маълумот учун, 2020 йилнинг 1 ноябрь ҳолатига фонд биржасининг умумий бозор капиталлашуви 52,55 триллион сўм ёки 5 миллиард АҚШ долларидан ортиқни ташкил этган.