AP: Хитой коронавирус келиб чиқиши бўйича тадқиқотлар чоп этилишига йўл қўймаяпти

Хитой мамлакатдаги коронавирус келиб чиқиши бўйича ўтказилаётган тадқиқотлар эълон қилинишига йўл қўймаяпти. Бу ҳақда Associated Press нашрида эълон қилинган суриштирувда айтилган.

Унда айтилишича, Хитой коронавирус келиб чиқишига алоқадор бўлган ҳар қандай суриштирувларни жиддий назорат қилиб, уларнинг чоп этилишига йўл қўймаяпти. Хитой ҳукумати бу билан чекланмай, коронавирус фақат Хитой ҳудудидан тарқалмагани ҳақида фаразлар оммалашиши учун ҳаракат қиляпти.

AP суриштирувига кўра, Хитой коронавирус борасида тадқиқот ўтказаётган олимлар, ҳарбийларга пул ажратмоқда, лекин барча натижалар шахсан Си Цзинпиннинг топшириғи билан тузилган комиссия назоратидан ўтиши керак. Associated Press суриштируви очиқ манбаларда эълон қилинмаган тадқиқотлар, кўплаб хитойлик, хорижий олимлар билан суҳбатлар ва тарқалиб кетган электрон ёзишмаларга асосланиб амалга оширилган.

Суриштирувда Хитой коронавирус борасидаги тадқиқотларга қаршилик қилаётганининг исботи сифатида кўршапалаклар яшайдиган ғорлардан олинган намуналар олимлардан олиб қўйилишини келтирган. Кўршапалаклар айни дамда инсониятни қийнаётган коронавирусга энг яқин бўлган Sars-Cov-2 вирусининг ташувчилари ҳисобланади.

Associated Press'да чиққан мақолада айтилишича, Хитойда коронавирусга оид тадқиқотлар эълон қилинишидан аввал махсус комиссия томонидан текширилиши «муҳим жараён» экани айтилмоқда. Нашр бу борада Хитой Фан ва технология вазирлигидан муносабат сўраб, жавоб ололмаган. Хитой ташқи ишлар вазирлиги эса Associated Press сўровига жавобан коронавирус бутун дунё бўйлаб тарқалгани, унинг устида тадқиқотлар билан глобал миқёсда шуғулланиш кераклигини таъкидлаган.

Маълумот учун, йил бошида Хитойда тарқала бошлаган коронавирус дунёнинг деярли барча мамлакатларида тарқалиб бўлди. Фақат бир нечта давлатдагина расман вирус аниқланмаган. Worldometers маълумотига кўра, айни дамгача дунё бўйлаб 82 миллион 860 мингдан ортиқ одамда коронавирус аниқланган. 1,8 миллиондан кўпроқ одам вирус қурбонига айланди.

Вирус юқтирганлар сони бўйича АҚШ етакчилик қилмоқда (20,1 миллион). Ҳиндистонда 10 миллиондан ортиқ одам касалланиб улгурди. Коронавирус илк марта аниқланган Хитой эса бу борада 81-ўринга тушиб кетди. Бугунгача 87 мингдан ортиқ хитойликда коронавирус аниқланган.