Сўнгги йилларда Россия ҳукуматининг асосий танқидчиси бўлган сиёсатчи ўлдирилган кунда уни хотирлаб минглаб кишилар иштирокида марш ўтказиларди, аммо бу йили Москва расмийлари марш ўтказишга рухсат бермади, буни пандемия муносабати билан жорий этилган чекловлар билан изоҳлашди. Анъанавий маршлар ташкилотчилари мэрияга кўприкка гулдасталар қўйиш маросимига халал бермаслик бўйича илтимос билан чиқишди.
Москворецкий кўпригидаги қотиллик жойига кун давомида одамлар гулдасталар кўтариб келишди. Шу жумладан, Ғарб давлатлари элчилари марҳум сиёсатчини хотирлашди.
Сиёсатчининг дўстлари, яқинлари ва тарафдорлари унинг Троекуровское қабристонидаги қабрига ҳам гуллар қўйишди.
«Оқ ҳисоблагич» («Белий счётчик») ташкилоти вакиллари маълумотига кўра, Москва вақти билан соат 17:30да Борис Немцовни хотирлаш учун Москворецкий кўпригига келганлар сони 8 мингга яқинни ташкил этган.
Юлия Навальная ҳам сиёсатчини хотирлаш учун келди. У журналистлар билан суҳбатлашишни рад этди.
Немцовнинг сафдоши Илья Яшин сиёсатчини хотирлаш учун келмоқчи бўлганлардан кўприкка плакатларсиз келишни сўради ва бу митинг ёки марш эмас, «хотира маросими» эканини эслатди. «Полицияга қўлга олиш учун сабаб қолдирмаслик керак», деган Яшин.
Мемориалга «Яблоко» партияси асосчиси Григорий Явлинский, шунингдек, «Парнас» партияси етакчиси, Россиянинг собиқ бош вазири Михаил Касьянов ҳам келди.
Немцовнинг қотиллиги рўй берган жойда ўрнатилган ёдгорликда кўнгилликлар навбатчилик қилишди. Мемориал ОАВда «Немцов кўприги» деб аталади.
Немцовнинг қотиллиги ёдга олинишига оз вақт қолганида, 19 феврал куни полиция мемориални ўраб олди ва гуллар ҳамда фотосуратларни олиб ташлади. Шунингдек, бу ерда навбатчилик қилаётганлар қўлга олинди.
Кейинроқ Москва мэриясидагилар буни мемориалда навбатчилик қилаётган кўнгиллилар «коммуналчилар билан жанжаллашиб қолгани» билан изоҳлади.
