10 йил олдин Борис Немцов ўлдирилганди. Бу жиноят ташкилотчиси ва буюртмачиси ҳамон топилмаган
|23:08 / 28.02.202516 70621 мин
Иш фигурантлари — қамалганлар ва судга чақирилмаганлар билан кейин нималар бўлди?
Anadolu / Getty ImagesAnadolu / Getty Images
2015 йил 27 феврал куни кечқурун Кремл яқинида, Катта Москворецкий кўпригида мухолифатчи сиёсатчи Борис Немцов отиб кетилади. Қотиллик ижрочилари сифатида Шимолий Кавказдан бўлган беш киши кўрсатилган, улар 11 йилдан 20 йилгача қамоқ жазосига ҳукм қилинган. Терговчилар ташкилотчи ва буюртмачи ролини республика раҳбарияти билан алоқаси бўлган чеченистонлик кучишлатарлардан бирининг ҳайдовчисига беришган, аммо уни топа олишмаган. Кучишлатар тизим ходимининг ўзи ва унинг нуфузли қариндошлари эса ҳатто сўроқ қилинмайди. «Медуза» Немцовни ўлдирганликда айбланиб судланганлар ва унинг ишида тилга олинган, аммо терговга жалб этилмаганлар ҳақида ҳикоя қилади. Қуйида бу одамларнинг кейинги тақдири ҳам келтирилади.
Судланганлар
Заур Дадаев
Фото: Сергей Бобилев, Коммерсантъ
Айблов версиясига кўра, Борис Немцовнинг ўлдирилиши қуйидагича амалга оширилган. 2015 йил 27 феврал куни тахминан соат 23:30 да у дугонаси, украиналик модел Анна Дурицкая билан Катта Москворецкий кўпригидан ўтаётганда орқасидан олти марта ўқ узилган. Немцов воқеа жойида ҳалок бўлади, Дурицкая жабрланмайди. Қотил яқинлашиб келаётган ZAZ Chance автомобилига чиқиб қочиб кетган.
Жиноятнинг бевосита ижрочиси — Заур Дадаев. У Чеченистоннинг «Север» баталёни командирининг ўринбосари эди. У қўлга олингани қотилликдан бир ҳафта ўтиб маълум бўлади. Немцовнинг ўлдирилиши бўйича тергов гуруҳи раҳбари Игор Краснов (ҳозирда у Россия бош прокурори) Дадаевни ҳибсга олиш бўйича сўровида унинг хизмат жойини тилга олмайди. Аммо у Дадаев жиноятига иқрор бўлиб кўрсатма берганини айтади.
Кўрсатмасида Дадаев Немцовни Charlie Hebdo журналига қилинган ҳужумдан кейин Муҳаммад расулуллоҳ (с.а.в)нинг карикатураларини нашр этишга чақиргани учун ўлдирганини айтган (аслида Немцовда бундай қилмаган). Дадаевнинг сўзларига кўра, сиёсатчини кузатишда унга узоқ қариндоши Анзор Губашев ва «Север» баталёнидаги хизматдоши Беслан Шаванов ёрдам берган, тўппончани эса Русик исмли шахсдан олган. У гўёки Дадаев ва унинг шерикларига беш миллион рублдан тўлашга ваъда берган. Кўп ўтмай, Дадаев бу кўрсатмалардан воз кечиб, ҳибсга олинганидан кейин қийноққа солинганини айтади.
Судда у Немцовнинг ўлдирилишига алоқаси йўқлигини таъкидлайди. Унинг танасидан ювилган моддалар (уларда ўқ маҳсулотларининг микрозаррачалари бўлган) ва унинг уйидан топилган патронлар (уларнинг белгиси Катта Москворецкий кўпригидан топилган гилзаларнинг белгиси билан бир хил эди) сиёсатчига айнан у ўқ узганининг исботи сифатида хизмат қилади. Дадаев 20 йилга қаттиқ тартибли колонияга ҳукм қилинган.
Мавзуга оид
Ҳукм 2017 йилда чиқарилган, 2018 йилда эса уни Иркутскдаги собиқ кучишлатарлар учун колонияда бўлиб ўтган зиёфат пайтида суратга олишган. Дадаев ҳозир қаерда экани аниқ маълум эмас. 2024 йил ёзида «Новая газета Европа» уни Немцовни ўлдирганликда айбланиб, «Россия давлати назорати остидаги ҳудуд»да (яъни Чеченистонда эмас) қолган ягона маҳкум деб атаганди.
Анзор ва Шадид Губашевлар
Шадид Губашев (чапда) ва Анзор Губашев (ўнгда) Москва округ ҳарбий судида
Фото: Дмитрий Коротаев / «Коммерсантъ»
Айблов томонига кўра, Анзор Губашев Беслан Шаванов билан бирга Немцов ўлдирилган куни унинг изига тушган ва Заур Дадаевни ZAZ Chance машинасида жиноят жойидан олиб кетган. BBC рус хизмати Анзор Губашевнинг жиноятга алоқадорлиги шубҳа туғдирмаслигини таъкидлайди: у Немцовни кузатиш учун «жанговар трубка»лардан (қотиллик иштирокчилари кузатув вақтида фойдаланган мобил телефонлар. Тергов Анзор Губашев бир сафар адашиб ушбу телефонлардан бирига ўз сим-картасини қўйганини исботлаб берган) биридан фойдаланган; уни ГУМдаги кузатув камералари орқали таниб олиш мумкин, у ерда сиёсатчи ўлимидан олдин кечки овқат қилган; унинг биологик излари Дадаев Немцов ўлдирилган жойни тарк этган ZAZ Chance машинасида топилган.
Анзорнинг укаси Шадид Губашев, айблов версиясига кўра, Немцовни кузатишда ёрдам берган, жиноий гуруҳ аъзоларини олиб юрган, бироқ қотиллик жойида кўриниш бермаган. Ҳибсга олинганидан бир ой ўтгач, Шадид акаси Дадаев ва Шавановга қарши гувоҳлик бериб, улар унга Немцовни ўлдирганини тан олганини айтди ва уни «»америкалик аблаҳ ва махлуқ» деб атади. Кейинчалик бу сўзларини қайтиб олди. Анзор Губашев ва Заур Дадаев ўз иқрорлик кўрсатмаларида Шадидни шерик сифатида кўрсатмаган (кейинчалик иккаласи ҳам бу иқрорлигидан воз кечган).
Якунда Анзор Губашев 19 йилга, Шадид Губашев эса 16 йилга озодликдан маҳрум этилди. «Новая газета Европа» маълумотларига кўра, 2024 йил август ҳолатига кўра, ака-укалар Чеченистоннинг Чернокозово колониясида «расман» қамоқ жазосини ўтаётган бўлган, ўтган йил бошида Анна Политковскаянинг ўлдирилишида иштирок этганлардан бири Жаброил Маҳмудов муддатидан олдин озод қилинган.
Беслан Шаванов
Заур Дадаевнинг «Север» баталёнидаги хизматдоши, у Анзор Губашев билан бирга қотиллик содир бўлган куни Немцовни кузатган. Ўз кўрсатмаларини бир неча марта ўзгартирган Анзор Губашев аввалига Шавановни шерик деб атаган ва Немцов ўлдирилган тўппончани у ташлаб юборганини айтди (қотиллик қуроли топилмайди), кейин Шаванов билан танишлигини рад этади, кейинчалик эса Немцовни Дадаев эмас, у отганини айтади.
Шаванов унга эътироз билдира олмасди. У 2015 йил март ойи бошида Грознийда қўлга олишга уриниш чоғида ҳалок бўлган — расмий версияга кўра, граната портлаган. Уни қўлга олишда «Север» баталёни иштирок этган бўлиши мумкин. Ўлими туфайли Шавановга қарши жиноий иш ёпилган.
Темирлан Эскерханов
Темирлан Эскерханов Москва округ ҳарбий судида
Фото: Глеб Щелкунов / «Коммерсантъ»
Эскерханов 2013 йилгача Чеченистон ИИВнинг Шелковский райони бўйича бўлимида хизмат қилган, у ерда жиноий гуруҳнинг бошқа тахминий аъзолари ҳам ишлаган. Қотилликдан олдинги кунларда у мунтазам равишда улар билан қўнғироқлашган ва улар билан бирга юрган. Хусусан, «Север» баталёни командири ўринбосари, ишнинг асосий фигурантларидан бири Руслан Геремеев билан ҳам.
Судда Эскерханов «фариштанинг кўз ёшидек пок» эканини айтади. Айбловга кўра эса, у Немцовнинг қотилларига ёрдам бергани таъкидланади: улар учун сиёсатчи ҳақида маълумот излаб топган ва уларни олиб юрган. У 14 йилга озодликдан маҳрум этилди.
2024 йилда «Новая газета Европа» Эскерханов афв этилгани ва Украинага урушга кетгани ҳақида хабар берди. Шу билан бирга, у штурмчи отрядга эмас, балки Шелковский райони ИИБдаги собиқ бошлиғи, Руслан Геремеевнинг амакиси Ваха Геремеевнинг ёнига қўшилди ва Россия томонидан босиб олинган Мариуполда «қулай ва хавфсиз шароитлар»да хизмат қилмоқда.
Ҳамзат Бахаев
Ҳамзат Бахаев
У Немцовнинг ўлдирилиши бўйича ишда энг кам муддат — 11 йил қамоқ жазоси олган фигурант. Айблов томони унинг ролини тахминан Эскерхановнинг роли билан бир хил тасвирлаган: у интернетда Немцов ҳақида маълумот тўплаган, шерикларини олиб борган, уларнинг кетишига ёрдам берган. Бахаевга қарши далиллар унинг телефони биллинги орқали шаклланган: масалан, унинг телефонини 2015 йил 1 март куни Заур Дадаев бир неча соат олдин учиб кетган аэропорт ҳудудида аниқлашган.
Шу билан бирга, Немцовни ўлдиришда иштирок этганларнинг квартиралари ва машиналарида Бахаевнинг излари йўқ эди, унинг йўналишлари сиёсатчининг йўналишлари билан кесишмаган, бошқа маҳкумлардан эса фақат Шадид Губашев (у қўшниси бўлган) билан қўнғироқлашган. Дадаев учиб кетган куни телефони аэропортга яқин ҳудудда бўлганини Бахаев оддий қилиб тушунтирган: у таксичи бўлиб ишлаган ва мижозни шу нуқтадан олиб ўтган.
Ҳатто Немцов оиласининг адвокатлари ҳам айблов Бахаевнинг айбини исботловчи етарли далилларни тақдим этмаганини айтишган. У ака-ука Губашевлар билан Москва областида бир уйни ижарага олгани учунгина бу ишга аралашиб қолган тасодифий одамдек таассурот қолдирарди, деб ёзади «Медуза». Ҳукмдан сўнг Бахаев Киров областидаги колонияга жўнатилган. Ҳозир қаердалигини аниқлаб бўлмади.
Ҳалигача топилмаганлар
Руслан Мухудинов
Заур Дадаев ҳибсга олинганидан кейин қандайдир Русик (ёки Руслик) деган шахс унга, Анзор Губашев ва Беслан Шавановга Немцовни ўлдириш учун беш миллион рубл ваъда қилганини айтди — ва у гўёки сиёсатчини отиб ўлдирган тўппончани берган. Судланувчиларнинг квартирасини тозалаш билан шуғулланган гувоҳ Зарина Исоеванинг терговга айтишича, чеченлар Руслан Мухудиновни Русик деб аташган.
У «Север» баталёни жангчиси бўлиб, баталён командири ўринбосари Руслан Геремеевни олиб юрган — Исоеванинг сўзларига кўра, уни компанияда Руслан деб аташган ва у «бошлиқ» бўлган. Тергов айнан Мухудинов «бошқа номаълум шахслар» билан биргаликда ижрочиларга Немцовни ўлдириш учун 15 миллион рубл таклиф қилганини, шунингдек, уларга уй, машина ва тўппонча тақдим этганини эълон қилди. Яъни уни жиноятнинг ташкилотчиси ва буюртмачиси деб атади.
Мухудиновга Немцовни ўлдириш нима учун керак бўлгани (пайғамбар карикатуралари ҳақидаги мотив четга суриб қўйилди, чунки Немцовни кузатиш Charlie Hebdo таҳририятига ҳужумдан анча олдин бошланган), бундай буюртма учун пулни қаердан олгани ва нима учун уни ҳозиргача топа олишмаётгани тушунарсиз бўлиб қолмоқда. 2015 йилда Мухудинов гоҳ БААдалиги, гоҳ Чеченистондалиги ёки умуман вафот этгани ҳақида миш-мишлар тарқалганди. Шу билан бирга, «Медиазона» ва Scanner Project унинг 2020 йилда олинган суратини топган. У ижтимоий тармоқлардаги Геремеев фамилияли аккаунтларда эълон қилинган.
Руслан Геремеев
Рамзан Қодиров ва Руслан Геремеев (Фото: adelimkhanov_95)
Немцов ўлдирилиши биланоқ унинг номи тилга олинган эди. Дастлабки сўроқларда Эскерханов уни Дадаев билан айнан Руслан Геремеев таништирганини айтганди. Эскерхановнинг сўзларига кўра, у билан даллол (эҳтимол, Мухудинов) боғланган бўлиб, у орқали Дадаевга Немцовни ўлдириш буюртма қилинган. Тергов Геремеевни топиб, сўроқ қилишга топшириқ беради — лекин фақат гувоҳ сифатида, чунки бу вақтга келиб Эскерханов ўз кўрсатмаларидан воз кечган эди.
Руслан Геремеев Рамзан Қодировнинг бир вақтнинг ўзида бир неча яқин сафдошларига қариндош. Унинг амакиси сенатор Сулаймон Геремеев. Яна бир амакиси Ваха Геремеев, илгари Шелковский ИИБ бошлиғи (у ерда Эскерханов ишлаган), ҳозирда Чеченистон раҳбарининг маслаҳатчиси. Амакиваччаси — Давлат думаси депутати Адам Делимханов. Геремеевнинг ўзи Адамнинг укаси Алибек Делимханов қўмондонлик қилган «Север» баталёни командирининг ўринбосари бўлиб хизмат қилган.
Терговчилар Руслан Геремеевни сўроқ қилишмади. Айтишларича, у Делимхановларнинг ота қишлоғи — Жалқада яшириниб юрган, кейин эса отбоқар қиёфасида Чеченистондан жўнаб кетган. Шунингдек, ТҚ раҳбари Александр Бастрикин унга сиртдан айблов эълон қилишдан икки марта бош тортгани хабар қилинган; Руслан Геремеевга қидирув эълон қилинмаган. Гарчи Немцовлар оиласининг адвокати Вадим Прохоров жиноятнинг ҳақиқий ташкилотчиси айнан у деб ҳисоблаган бўлса-да.
Украина билан уруш бошлангунга қадар у ҳақда ҳеч қандай хабар йўқ эди. 2022 йилда Руслан Геремеев (амакилари Ваха Геремеев ва Адам Делимханов каби)нинг дараги Мариуполдан чиқди, у шаҳарни эгаллашда иштирок этган ва яраланган. Рамзан Қодиров уни кўриш учун ҳоспиталга борди, уни «қадрдон иним», «энг яхши жангчи» деб атади. 2023 йилда Руслан Геремеев Қодировнинг 17 ёшли ўғли назоратидаги янги чечен баталёнига қўмондон бўлди.
Артур Геремеев
Геремеевлар оиласининг яна бир вакили, Руслан Геремеевнинг жияни. Москванинг Веерная кўчасидаги Заур Дадаев, Руслан Геремеев, шунингдек, Немцов қотиллигининг бошқа тасдиқланган ва тахмин қилинган иштирокчилари яшаган иккита квартирадан бири — Веерная, 46-уйдаги квартира унинг номига расмийлаштирилган. Артур Геремеев 2014 йил декабр ойида Заур Дадаев билан бирга Москвага учиб келган ва 2015 йил 28 февралда, Немцов ўлдирилганидан бир кун ўтиб учиб кетган.
Немцовнинг ўлдирилиши бўйича тергов гуруҳи раҳбари 2015 йил октябр ойида Руслан Мухудинов, шунингдек, Руслан ва Артур Геремеевларни топишга кўрсатма берган. Биринчисига айблов қўйиш, қолган иккисини — гувоҳ сифатида сўроқ қилиш режалаштирилганди. Терговчилар Чеченистоннинг Шелковский районидаги Старогладковский станицасига келган (Геремеевлар ва Мухудинов шу ерда рўйхатдан ўтганди), аммо уларни топа олмаган: Мухудиновлар оиласи кўчиб кетган, Геремеевларникида эса эшикни ҳеч ким очмаган.
Шундан сўнг Руслан каби Артур Геремеев ҳақида ҳам узоқ вақт ҳеч қандай хабар берилмади. Аммо яқинда «Агентство» у 2023 йилда Украинанинг босиб олинган ҳудудларига борганидан хабар топди. Катта эҳтимол билан, Артур Геремеев ҳам қариндошлари каби урушда қатнашган.
Излаб ҳам кўрилмаганлар
Жабраил Элдаров
Жабраил исми жиноят иши материалларида учрайди. Унинг исми гувоҳ Зарина Исоева томонидан айтилган, у Немцовнинг эҳтимолий қотиллари яшаган Веерная кўчаси, 3-уй ва Веерная кўчаси, 46-уйлардаги хонадонларни тозалаш билан шуғулланган. У Жабраилнинг фамилиясидан хабардор эмасди. Натижада бу одам иш материалларида фақат номи билан қолади, унинг Немцовни ўлдиришдаги роли тушунарсиз эди. Сиёсатчининг оиласи адвокати Вадим Прохоров Жабраил ФСБда ишлашини тахмин қилган.
Жабраилнинг фамилияси 2024 йил ёзида «Проект» томонидан келтирилади. Журналистлар бу одамнинг рақами бошқа абонентларда Жабраил Элдаров деб сақланганини аниқлади. Немцовни кузатиш даврида ва қотилликдан кейинги дастлабки кунларда Элдаров жиноятнинг қолган иштирокчиларига 754 марта қўнғироқ қилган. Элдаровнинг қариндоши «Проект»га улар билан танишлиги, аммо қотилликка алоқаси йўқлигини айтган.
«Проект», шунингдек, Элдаровнинг Қодировлар уруғи билан алоқалари борлиги ва Рудик Искужиннинг қизига уйланганини ёзган. 1980-йилларда Искужин Путин билан КГБ институтида ўқиган, ҳозир эса Бошқирдистондан сайланган сенатор ҳисобланади.
Асланбек Хатаев
2017 йилда «Медуза» ушбу шахсни Заур Дадаев билан бирга кўришгани, бироқ қотилликда унинг роли аниқ эмаслиги ҳақида ёзганди. Кейинроқ «Медиазона» ва Scanner Project Хатаевнинг Шелковский райони ИИБ ходими бўлгани ҳақида хабар берди — у бу ерда ППХ инспектори сифатида рўйхатга олинган, аммо аслида Чеченистоннинг юқори мартабали шахсларини қўриқлаган. Телефон китобчаларида Хатаев Aslanbek Delimhanov ва «Асламбек ва Адам» сифатида ёзилган. «Проект» у Адам Делимхановнинг қўриқчиси бўлганини ёзган.
Немцовнинг ўлдирилишидан бир неча кун олдин ва ундан кейин Хатаев Делимханов ва сенатор Сулаймон Геремеевнинг ёрдамчиларига қўнғироқ қилган, шунингдек, уларнинг ўзлари билан суҳбатлашган. Бундан ташқари, у қотилликнинг эртаси куни Руслан Геремеев билан учрашган ва гуруҳ аъзоларини эвакуация қилишда иштирок этган. Чеченистонга қайтиб келганидан сўнг, Хатаев Делимханов туғилган қишлоқ Жалкага кўчиб ўтади. Терговчилар уни шахсан сўроқ қилмайди ва фақат чечен ҳамкасбларига саволлар юборади.
Халид Уцимиев
Немцов ўлдирилган вақтда у ҳам Шелковский райони ИИБ ходими ва Хатаевнинг расмий бошлиғи бўлган. Уцимиев сиёсатчи ўлдирилган куни Москвага учиб келган, Веерная кўчас, 46-уйда турган ва Эскерханов, Руслан Геремеев ва Заур Дадаев билан доимий алоқада бўлган. Улар илгари ҳам қўнғироқлашган: 2014 йил октябр ойидан бери Уцимиев Немцовни кузатиш ва ўлдириш гуруҳи аъзолари билан 300 га яқин марта телефон орқали суҳбатлашган.
Хатаев каби Уцимиевни ҳам Москвада сўроқ қилишнинг иложи бўлмайди, уларни Чеченистондаги терговчилар сўроқ қилишади. Уцимиевнинг таъкидлашича, у фигурантлар билан дўстлари ва ҳамкасблари сифатида мулоқот қилган. Унга ҳеч қандай айб қўйилмайди. Ҳозир унга нима бўлгани номаълум.
Али Алиев
Хатаевга яқин одам, қотилликдан олдинги ва кейинги кунларда у ва Руслан Геремеев билан кўп марта қўнғироқлашган. Қотилликдан бир кун олдин улар «Украина» меҳмонхонасида учрашишган. Учрашувдаги тўртинчи шахс хонанда ва тадбиркор Александр Дмитерко бўлган. «Медиазона» билан суҳбатда Алиев фақат Хатаевни билишини айтди, гарчи меҳмонхонадаги кузатув камералари улар учрашувдан тўрт киши бўлиб чиққанини қайд этган бўлса-да.
Алиев ва Дмитерконинг «Медиазона»га маълум қилишича, улар терговчилар билан мулоқот қилган, бироқ бу ҳақда жиноят иши материалларида маълумот йўқ. Ҳозир уларга нима бўлгани номаълум.
Магомед Эдилсултанов
Бу одам 2004 йилда Forbes’нинг рус таҳририяти асосчиси Пол Хлебниковнинг ўлдирилишидан кейин бир неча йил давомида қидирувда бўлган. Тергов уни жиноятни уюштиришда воситачилардан бири деб ҳисоблади, деб ёзган «Проект». 2010 йилда Эдилсултановнинг ўзи тергов органларига келиб, кўрсатма берган, шундан сўнг унга қўйилган айбловлар олиб ташланган.
2014 йил октябридан 2015 йил 1 мартигача Эдилсултанов Немцовга суиқасд иштирокчиларига 391 марта қўнғироқ қилган — бу «Проект» кўрган жиноий иш материалларидаги биллинглардан маълум. Шу билан бирга, иш материалларида Эдилсултановнинг исми тилга олинмаган.
Эдилсултанов Қодиров билан алоқадор: унинг акаси Чеченистон раҳбарининг Иваново областидаги вакили бўлиб ишлаган, жияни эса Қодировнинг ўғлига мураббийлик қилган. «Агентство»аниқлашича, Эдилсултанов камида 2023 йил август ойида соғ-саломат бўлган: у ўшанда Туркияга учганди.
Абдул Элмурзаев
Бу одам ҳақида кўп нарса маълум эмас. Жиноят иши материалларидан олинган телефон биллингларига кўра, Элмурзаев 2014 йил декабр ойининг иккинчи ярмида Немцовни кузатган ва бешта олти рақами билан тугайдиган «жанговар трубка»лардан биридан фойдаланган. Кейинчалик худди шу рақамдан Заур Дадаев ҳам фойдаланган. Иш материалларида Элмурзаев сўроқ қилингани ёки қилинмагани ҳақида маълумот йўқ.
«Агентство» Абдул Элмурзаев ИИВ қидирув базасида пайдо бўлганини аниқлаган. Уни қачон ва нима сабабдан қидира бошлашгани номаълум.
Шамхан Тазабаев
Чеченистон ИИВнинг собиқ ходими. Немцов ўлдирилганидан бир ярим соат ўтгач, кузатув камераси уни Артур Геремеев, Руслан Мухудинов ва Заур Дадаев билан бирга Веерная кўчаси, 46-уйда қайд этган. Бир соатдан сўнг улар хонадонни тарк этишади. Суд жараёнида Немцовлар оиласининг адвокатлари Тазабаевни сўроқ қилишни сўрашган. Афтидан, тергов уни топа олмади.
Сулейман Геремеев ва Адам Делимханов
Амакиваччалар ва Чеченистоннинг Россия парламентидаги вакиллари: Давлат Думасида Делимханов, Федерация Кенгашида Геремеев. Иккаласи ҳам Рамзан Қодировнинг яқин сафдошлари бўлиб, журналистларнинг фикрича, унинг манфаатлари йўлида рейдерлик ва сиёсий қотилликлар билан шуғулланиши мумкин. Иккаласи ҳам Чеченистон раҳбарига қариндош бўлиб, кичик қариндошларини Қодировнинг ўғилларига турмушга беришган.
Немцов ишининг кўплаб фигурантлари Сулаймон Геремеев ва Адам Делимханов билан у ёки бу тарзда боғлиқ. Улардан икки нафари — Асланбек Хатаев ва Руслан Геремеев сиёсатчи ўлдирилган куннинг эртасига уларга қўнғироқ қилган. Шунингдек, уларнинг ёрдамчилари билан ҳам қўнғироқлашган. Шунга қарамай, Немцов иши бўйича тергов Сулаймон Геремеев ва Адам Делимхановни сўроқ қилишдан бош тортади. Судда ҳам улар кўриниш беришмайди — у ерга фақат Адамнинг туғишган укаси, «Север» баталёнининг собиқ командири Алибек Делимхонов келади. У ҳам аксар саволларга жавоб бермайди.
Ҳозирда Сулаймон Геремеев Федерация Кенгашида ишлашда давом этмоқда, январ ойида Қодиров уни туғилган куни билан табриклаган эди. Сўнгги пайтлардаги энг шов-шувли янгиликлар унинг ўзи билан эмас, жияни билан боғлиқ бўлиб, унинг машинасидан еттита тўппонча ва тўртта автомат топилган.
Чеченистон раҳбарининг энг яқин ёрдамчиси Адам Делимханов янгиликларда кўпроқ кўриниш бермоқда. Россиянинг Украинага босқини бошланганидан сўнг, у ҳам Геремеевлар сингари Мариуполни эгаллашда иштирок этган. Миш-мишларга кўра, у яраланган, генерал-майор унвонини олган, шунингдек, Россия, Чеченистон ва ўзини ўзи эълон қилган ЛХР Қаҳрамони бўлган.
