Ўзбекистонликлар учун криптовалюта бозори очилади

Крипто-биржалар фаолиятини лицензиялаш тартиби тўғрисидаги низомга ўзгартириш киритиш тўғрисида қарор лойиҳаси жамоатчилик муҳокамасига қўйилди. Унда Ўзбекистон ноорезидентларига ҳам крипто-биржаларда савдо қилишга рухсат берилиши кўзда тутилмоқда.

Киритилаётган ўзгартиришларга кўра, Ўзбекистон Республикаси резидентлари ва норезидентлари томонидан эмиссия қилинган токенларни рўйхатдан ўтказиш, чиқариш ёки айлантиришга рухсат берилади.

Қарор лойиҳаси маъқулланса, Ўзбекистон фуқаролари крипто-биржаларда крипто-активлар ва токенлар билан крипто-биржа савдоларининг барча турларини миллий ва чет эл валютасида амалга ошириши мумкин бўлади. Бунда сотиб олиш объекти сифатида крипто-активларни танлаш ва бу танловнинг тегишли оқибатлари сотиб олувчининг ўз таваккалчилиги асосида бўлиши кўзда тутилмоқда.

Қарор лойиҳаси муҳокамаси жорий йил 14 майда якунланади.

Маълумот учун, Ўзбекистонда барча крипто-активларнинг фаолияти лицензия асосида бўлади ва 2020 йилнинг бошида очилган крипто-биржада амалга оширилади. Биржа иштирокчилари фақатгина олдин қўлга киритилган крипто-активларни чел эл фойдаланувчиларига сотиши мумкин. Криптовалютага эга бўлмоқчи бўлган фуқаролар уни фақат майнинг қилиши мумкин.

Умуман, криптовалюта савдоси билан шуғулланиш учун Ўзбекистонда тўлақонли ҳуқуқий асослар мавжуд эмас эди.

Шу пайтгача криптовалюта савдоси билан ноқонуний шуғулланган фуқароларга Жиноят кодексининг 177-моддаси (валюта қимматликларини қонунга хилоф равишда олиш ёки ўтказиш) ва 190-моддаси (фаолият билан лицензиясиз шуғулланиш) билан жиноят иши қўзғатилган.

Муҳокамага қўйилган қонун лойиҳаси кучга киргач, криптовалюта бозори ўзбекистонликларга очилиши кутилмоқда.

#криптовалюта

Kun.uz янгиликларини Google News'да кузатинг

+ Обуна бўлиш