АҚШ вице-президенти Жей Ди Вэнс Республикачилар партияси уруш туфайли Конгресс учун ўтказилган оралиқ сайловда мағлубиятга учраганини маълум қилди. У Twitter (Х) тармоғидаги постини, жумладан, можаро оқибатлари ҳақида огоҳлантирган ҳамда бугун ҳафсаласи пир бўлган тарафдорларига ҳам қаратиб, уларнинг ҳақ бўлиб чиққанини тан олди. Вэнснинг сўзларига кўра, бир кун аввал урушнинг мағлубиятга алоқадорлигини президентнинг ўзи ҳам тан олган. Трамп Fox News телеканалига берган интервьюсида уруш республикачиларнинг мағлубиятига таъсир қилганини тан олган бўлса-да, уни бошлаш тўғри қарор бўлганини қатъий таъкидлаган эди.
Вэнснинг таъкидлашича, гап давоматда эмас, чунки республикачи сайловчилар сайлов участкаларига борган. Масалан, Флоридада овоз берганлар орасида республикачилар демократларга қараганда 9 пунктга кўп бўлди — бу 2024 йилдагидан атиги икки пунктга кам, холос. Унинг сўзларига кўра, асосий муаммо шундаки, икки йил муқаддам Трамп ва Вэнсга овоз берганларнинг кўпчилиги бу сафар демократларни қўллаб-қувватлаган.
Вице-президент республикачилар мамлакат миқёсида демократлардан 13 пунктга ортда қолишини аниқ башорат қилган социологнинг маълумотларига таянди. Мазкур мутахассис партиядан юз ўгирган сайловчилардан уларни нима ортга қайтариши мумкинлигини сўраган. Деярли барча жавоблар тўртта талабга — урушни тўхтатиш, нархлар ошиши муаммоси билан шуғулланиш, Американи биринчи ўринга қўйиш ҳамда Исроил билан муносабатларни ўзгартиришга бориб тақалган.
Вэнс урушни ўринли деб ҳисоблайдиганларга бу ҳақда очиқ гапиришни таклиф қилди:
«Агар бу шунга арзиганини, Сенатни кейинги олти йилга бой бериш шунга арзиганини исботламоқчи бўлсангиз — марҳамат, исботланг. Бу товонни тўлашга арзиганини исботлаб беринг. Бунга қўшилиш ёки қўшилмаслик мумкин, аммо бу ҳеч бўлмаганда ҳалол иш бўлади».
3 ноябрь куни бўлиб ўтган сайловда демократлар Конгресснинг ҳар икки палатаси устидан назоратни қўлга киритди, Сенатда улар 100 та ўриндан камида 54 тасига эга бўлди. Трампнинг ўзи эса ижтимоий тармоқда партиядошларининг мағлубиятини киноя қилиб - сайлов бюллетенида ўзининг исми бўлмагани билан изоҳлади.
