Бизнес-мураббий Муҳаммад Али Эшонқулов MFaktor лойиҳасидаги суҳбатда ният, ризқ ва тадбиркорлик ҳақидаги фикрлари билан ўртоқлашди.

«Одам ўз ниятига яраша олади. Худодан ризқимни ҳалолидан бергин ва осон қилиб бергин, деб сўраш керак экан. Одам ўзидан норози бўлиши керак, лекин кўпчилик тескариси: ўзини мукаммал одам деб ҳисоблаб, худо берган тақсимотга норози бўлиб юраверади. Бу – ношукрлик. Ношукрлик доим ҳасратни келтириб чиқаради.

Ким ўзида бор нарсаларга шукр қилса, Аллоҳ таоло уни унда йўқ нарсалар билан ризқлантиради-да. Бир инсон қийналиб, кун иссиқлигидан терлаб тепага юк тортиб чиқаётган экан. Тўхтаб, худога нолибди: «Эй худо, мен шу бир бурда нонни топаман деб жонимни шунча қийнашим шартми? Ризқимнинг кафиллигини олган бўлсанг, мен ётсам-у ризқим ўзи келаверса бўлмасмиди?»

Сал нарироқда икки одам уришаётган экан. У уларни ажратаман деб келса, шу пайт миршаблар келиб, учаласи жамоатчилик тинчини бузяпти деб олиб бориб қамаб қўйибди. Зиндонда, совуқда ётса, эшик тақиллабди. Қараса, нон билан сув олиб келишган экан. Кейин тавба қилган экан: «Эй худо, бу ерда ризқимни еб ётгандан кўра, озодликда тинчгина меҳнат қилганим яхши эди».

Энг муҳими, ниятни тўғри қилиш. Режалаштиришда хато қилиш – хато қилишни режалаштириш дейишади. Шунинг учун инсонлар ҳаётини режа қилаётганда, ният қилиб сўраётганда ўзига ўзи чегара қўймаслиги керак.

Бир баҳодир чўл-у даштда сувсизликдан қийналиб, адашиб қолибди. Юриб-юриб, ҳолдан тояй деган пайти ҳовузни кўриб қолибди. Тип-тиниқ, зўр ҳовуз экан. Кучини бир жойга йиғиб, у ерга етиб бориб, энди ҳовуздаги сувдан ичаман деса, ёнида уч бошли аждар ухлаб ётибди экан. Қиличини чиқариб, олишиб кетибди. Анча пайт жанг қилиб, битта калласини олибди. Яна анча вақт курашиб, иккинчи калласини олибди. Кейин иккаласи ҳам чарчаб, бир-бирига суяниб қолибди. Шунда аждар сўрабди: «Ўзи нимага келгандинг?» Баҳодир айтибди: «Сув ичмоқчи эдим». Аждар айтган экан: «Ичаверсанг бўлмасмиди, мен сенга бирор нарса дедимми?»

Яъни ўзимиз йўқ жойдан уч бошли аждарлар яратиб олмаслигимиз керак. Муаммога ўзингизни бориб урмасангиз, тегмасангиз, муаммо сизга тегмайди. Онг остида бор нарса: одам касалликни ўзи чақиради.

Шунинг учун энг аввало ниятимизни поклаб, тўғрилаб олишимиз керак. Масалан, «Шу бизнесни бошлаяпман, бошида катта қийинчилик бўлади, 3-6 ойлаб катта минусга кирамиз, лекин бардам бўлишимиз керак, 6 ойдан кейин зўр бўлиб кетади» деса, у 6 ой аниқ фойдага кирмайди.