Сайхунобод молия бўлими мудири суд қарори бўлса-да, лавозимига тикланмаяпти. Асоссиз тўсқинлик салкам 1 йилдан бери давом этмоқда     

“2011 йилдан 2013 йилга қадар Сайхунобод туман молия бўлими мудири лавозимида ишлаб келган давримда менга нисбатан жиноят иши қўзғатилиб,  210-модда билан жиноий жавобгарликка тортилганман. 2019 йил августга келиб оқланганман. Шундан сўнг, ишга тиклаш масаласида судга мурожаат қилганман” – дейди Мавлон Шергазиев.

М.Шергазиевнинг мурожаатига асосан ФИБ Сирдарё туманлараро суди 2020 йил 18 сентябр куни ҳал қилув қарори чиқариб, жавобгар Сайхунобод туман ҳокимлиги ва Сирдарё вилоят молия бошқармасига М.Шергазиевни Сайхунобод туман молия бўлими мудири ёки шунга тенглаштирилган лавозимга ишга тиклаш ва 2013 йилдан ҳозиргача бўлган муддатни умумий меҳнат стажига ва ихтисослик бўйича иш стажига қўшиш мажбуриятини юклайди.

Бироқ ушбу суд қарори ҳозирга қадар ижро этилмай келмоқда. М.Шергазиевнинг айтишича, унинг мазкур қарор ижросини таъминлаш бўйича МИБ Сайхунобод тумани бўлими, Сирдарё вилоят бошқармаси ва МИБ директори Ҳ.Кабиржонов номига йўллаган мурожаатлари бесамар кетган.

“Яқинда шахсан туман прокурори қабулига кирганман. Прокурор олдимда вилоят молия бошқармасига телефон қилди ва “Бу жиддий масала. Фуқаро 8 ойдан бери сарсон бўлиб юрган экан, қонуний ижросини таъминлаб беринг. Суд қарорига асосан тенглаштирилган иш беринг” деди. Эртаси куни бошқармага борсам, бошқармадан битта иш ва Сайхунобод тумани молия бўлими мудири ўринбосари лавозимини таклиф қилишди. Бунга рози бўлмадим” – дейди М.Шергазиев.

Ушбу ҳолат бўйича МИБнинг изоҳ беришича, ижрочи томонидан суд қарорини ижро қилишни сўраб туман ҳокимлиги ва вилоят молия бошқармасига мурожаат қилинган. Шунингдек, ушбу жараёнда ижрони таъминлаш мақсадида М.Шергазиевга Сайхунобод туман ҳокимлиги томонидан туман “Тоза ҳудуд” ДУК раҳбари лавозими, вилоят молия бошқармаси томонидан молия бошқармаси бўлим бошлиғи ҳамда Сайхунобод тумани молия бўлимининг шуъба мудири лавозимлари таклиф қилингани, бироқ М.Шергазиев ушбу таклифларни рад этгани, шунга қарамай ҳозирда ижро ҳаракатлари давом эттирилаётгани маълум қилинди.

Ҳолат юзасидан Сайхунобод туман ҳокимлиги ва Сирдарё вилояти молия бошқармаси берган изоҳлар бир-бирига ўхшаш бўлди. Ушбу изоҳларда суд қарори ижросини таъминлаш мақсадида М.Шергазиевга бир қатор лавозимлар таклиф этилгани, бироқ у бу лавозимларни рад этгани таъкидланди.

М.Шергазиевнинг қўшимча қилишича, бошқа туманнинг молия бўлими мудирлиги, туман ҳокимининг иқтисод бўйича ўринбосарлиги ёки вилоят молия бошқармаси бошлиғининг ўринбосарлиги каби лавозимлар туман молия бўлими мудири лавозимига тенглаштирилган ҳисобланади ва бундай лавозимлар унга таклиф этилмаган.

Маълум бўлишича, Сайхунободга қўшни туман – Сирдарё тумани молия бўлими мудири лавозими бир неча ойдан буён вакант бўлса-да, М.Шергазиев ушбу лавозимга тайинланмаган.

Ушбу ҳолат бўйича вилоят молия бошқармаси бошлиғи Ойбек Раҳимов билан боғланганимизда, у М.Шергазиевни ушбу лавозимга тиклаш ўзининг ваколатига кирмаслигини, бунинг учун Сирдарё тумани ҳокими қарор чиқариши лозимлигини таъкидлади.

М.Шергазиев 2021 йил 1 июл куни Сайхунобод туманида суд-ҳуқуқ масалалари бўйича ўтказилган оммавий қабулда Судялар олий кенгаши раиси Холмўмин Ёдгоровга ҳам муаммони батафсил тушунтиради. Аммо шундан сўнг ҳам муаммо ўз ечимини топмайди.

Холмўмин Ёдгоров ҳам бошқа бир тадбирда ушбу воқеани ёдга олди.

“Кеча Сирдарёда ўзим қабул қилдим. 1 йил муқаддам ишга тиклаш тўғрисида суд ҳал қилув қарори чиққан. Оқланганидан кейин у (суд томонидан) ишга тикланяпти. 1 йилдан бери ишга тикланмаган. Мажбурий ижрони чақирдик, тегишли мутасаддиларни чақирдик, иш берувчини чақирдик. Ахир жиноий жавобгарлик борку?” – дейди Х.Ёдгоров.

Аслида, ушбу вазиятда Сирдарё тумани молия бўлимининг ҳозирги мудири лавозимидан озод қилиниб, ўрнига ҳеч қандай гап-сўзсиз М.Шергазиев тикланиши лозим эди. Чунки, Меҳнат кодексининг 106-моддасида бир ишни илгари бажариб келган ходим ишга тикланган тақдирда, ходим билан меҳнат шартномаси тарафлар ихтиёрига боғлиқ бўлмаган ҳолда бекор қилиниши кўрсатилган. Ушбу модда нега ижро қилинмаётгани бўйича саволимизга Сайхунобод туман ҳокимлиги ҳам, МИБ ҳам тайинли жавоб бера олмади.

Бунинг ўрнига вилоят молия бошқармаси М.Шергазиевнинг хоҳишига қарши ўлароқ, 2021 йил 5 июл куни уни Сайхунобод туман молия бўлими мудири лавозимига ишга қабул қилиш тўғрисида буйруқ чиқариб қўйган.

Сирдарёда фуқаро фойдасига суд қарори чиққан бўлса-да, 10 ойлаб на ўз лавозимига на унга тенглаштирилган лавозимга тикланолмай юради, ҳокимлик суд қарорини ижро қилмайди, бунинг учун МИБ ходими ҳокимликни жавобгарликка тортолмайди. Оддий фуқародан ундирувни амалга оширишда фаол бўладиган ижрочилар ҳокимият вакилларига келганда “тишсиз бўри”га айланиб қолаётгани ачинарли ҳолат.

Астойдил хоҳиш бўлса, суд қарорини ижро қилишга ҳеч нарса тўсқинлик қилмайди. Аммо, Сирдарёдаги ҳолат мисолида ҳокимият вакиллари томонидан етарлича қаршиликлар бўлаётганини сезиб олиш қийин эмас.

Сўзимизни яна ўша савол билан тугатамиз: туман ҳокими Судялар олий кенгаши раисининг гапини инобатга оладими?

Аббос Салайдинов
Тасвирчи ва монтаж устаси – Абдусалим Абдувоҳидов