Ўзбекистонда бизнес-таълимнинг оммалашишида MFaktor лойиҳаси алоҳида ўрин тутади. Ёшлар ва айниқса тадбиркорлар учун фойдали лойиҳа бугунги кунда зиёли ва илмли бизнесменлар минбари сифатида танилиб улгурди.
Лойиҳа асосчиларидан бири – Ҳусан Мамасаидов Kun.uz “Business Class” рукнининг навбатдаги сони меҳмони бўлди.
Суҳбатдошимизни кўпчилик акаси Ҳасан Мамасаидов билан биргаликда Office Market, Deli ва Decos каби номдор бренд асосчилари сифатида танийди. Биз кўрсатув давомида муваффақиятли тадбиркорнинг бизнесда босиб ўтган йўли, ҳаётий тажриба ва хулосалари билан қизиқдик.
“Бизнесменлик қобилиятини худо юқтирган инсонлар кўп, лекин агар тадбиркорлик илмини билсангиз, бизнесингизни кенгайтириш имкони кўпроқ бўлади.
Албатта, худо барака берса, бизнеснинг илмини билмасдан ҳам барака топган инсонлар кўп. Лекин ҳамманинг ҳам тоғаси ё амакиси тижоратдаги инсон эмас-да.
Биз Ҳасан акам билан 1994-1998 йилларда бизнес бошқаруви факультетида ўқиганмиз, у ерда ҳар ой Малазиядан профессорлар келарди. Маркетинг, молия, иқтисодиёт, менежмент каби ҳар хил фанлардан дарс олганмиз. 1997 йилда оилавий бизнесимиз – Office Market'ни бошлаганимизда биз олган назарий билимлар ва дадамизнинг ҳаётий мактабларини бирлаштирганмиз. Натижада, кўп канцтоварчилар орасида Office Market бўлиб ажралиб чиқа олдик.
Канцтовар бозорига кирган пайтимизда, биздан зўрлар кўп эди. Биз тўрт қути ручка олиб бошлаганмиз. “Қуёшли” бозорида ишлайдиган яхши акаларимиз бор, улар ҳалигача 3х4 ўлчамли дўконда ўтиришибди. Биз улардан мол олиб сотишни бошлагандик... Лекин ҳозирги кунда бизнинг корхонамиз керак бўлса “Қуёшли”даги 400та дўкондан камида 100тасига товар етказиб беради.
Яъни, бизнесда ҳам илм муҳим экан. Илмини билмасангиз, кичик миқёсда юраверасиз: қора қозон қайнайди, “Нексия”нгиз “Ласетти” бўлади, “Ласетти”нгиз “Каптива” бўлар, лекин масштаблаштириш учун илм керак.
Бизнес илми ҳақида гап кетганда, энг катта муаммо – ёшларимизнинг кўпи рус тили ёки инглиз тилини билмаслигида. Бизнинг бахтимиз – ўз вақтида ота-онамиз бизга рус тили ва инглиз тилини ўрганиш учун шароит қилиб берганлар.
