“Навоийазот” АЖ томонидан Зарафшон дарёсига ҳаёт учун хавфли бўлган моддалар оқизилган, оқибатда дарё суви заҳарланиб, кўплаб балиқлар нобуд бўлган. Экология қўмитаси бу ҳолатни ноинсофлик дея баҳолади.
Қўмита матбуот хизматининг маълум қилишича, корхонага қарашли 267-қудуқдан дарёга ҳаёт учун хавфли моддалар чиқарилган.
Навоий вилояти Экология ва атроф-муҳитни муҳофаза қилиш бошқармаси инспекторлари томонидан Зарафшон дарёсининг Кармана туманидан оқиб ўтувчи қисмининг 5 та нуқтасидан таҳлил намуналари олиб, текшириб кўрилган.
Натижада дарё сувида азот аммоний белгиланган меъёрлардан 21 маротаба, азот нитрат 2,6 маротаба, азот нитрит 60 маротаба, хлоридлар 1,3 маротаба, мис ионлари 2,1 маротаба юқорилиги ҳамда дарёда ёппасига заҳарланиш юзага келгани аниқланган.
Ҳозирда ҳолат юзасидан дастлабки ўрганиш-суриштирув ишлари давом этмоқда.
