Жорий йил 4 ноябрдан мамлакат айрим ҳудудларида ва Тошкент шаҳрида бошланган мавсумга хос бўлмаган чанг-қумли бўрон ҳодисаси оқибатида “Тез ёрдам” хизматига аллергик реакциялар ва бронхиал астма хуружи билан боғлиқ мурожаатлар сони ошган. Бу ҳақида Соғлиқни сақлаш вазирлиги ахборот хизмати хабар берди.
Ушбу ҳолат юзасидан Соғлиқни сақлаш вазирлигининг алоҳида назорати ташкил этилиб, “Тез ёрдам” хизмати томонидан аҳолига зарур тиббий ёрдам кўрсатиш чоралари кўрилмоқда.
“4 ноябрь куни “Тез ёрдам” хизматига жами чақириқлар сони 4082 тани ташкил этиб, 3 ноябрь ҳолатига кўра, мурожаатлар сони 649 тага ошди. 5 ноябрдан 6 ноябрь соат 06.00 га қадар умумий чақириқлар сони 4110 тага етиб, нафас олиш билан боғлиқ мурожаатлар сони 709 тани (жами чақириқларнинг 17,2 фоизи) ташкил қилди. Шундан аллергик реакциялар билан 36 та, бронхиал астма хуружи билан 122 та мурожаат бўлиб, уларнинг 11 таси госпитализация қилинди.
Эслатиб ўтамиз, юртимиз аҳолиси бундай об-ҳаво шароитида зарурат сезганда, ўз ҳудудидаги оилавий шифокор пункти, оилавий поликлиникаларга мурожаат қилиб, сифатли тиббий хизматдан фойдаланишлари мумкин”, дея маълум қилган Республика шошилинч тиббий ёрдам илмий маркази Тошкент шаҳар тез тиббий ёрдам станцияси бош шифокори Дониёр Бўрибоев.
Таъкидланишича, Республика шошилинч тиббий ёрдам илмий маркази ва унинг ҳудудлардаги 13 та филиали ҳамда туман ва шаҳар бўлимларида зарур дори-дармонлар билан етарли миқдорда тўлиқ таъминланган ва вазирликнинг “1003” қисқа рақамли Саll-марказининг малакали мутахассисларидан чангли ҳаводан қандай ҳимояланиш бўйича кун-у тун керакли маслаҳат ва тавсиялар олишлари мумкин.
Маълумот учун, 12 ноябрь санасига қадар ёғингарчилик кутилмаётгани боис мутахассислар ҳаводаги зарарли чанг-ғубор яқин кунлар ичида ҳам сақланиб қолишини маълум қилишган.
