Наманган вилояти Соғлиқни сақлаш бошқармаси ходими ва ҳамшира пора олаётганда қўлга олинди

Улар ўзаро тил бириктириб, ишга киритиб қўйиш эвазига фуқародан 700 АҚШ доллари талаб қилишган. Бу ҳақда Бош прокуратура ҳузуридаги Департамент хабар бермоқда.

Қайд этилишича, Наманган вилояти перинатал маркази ҳамшираси М.С. фуқаро Ф.ни Соғлиқни сақлаш бошқармасида ишловчи таниши орқали Кардиология шифохонасига ишга киритиб қўйиш эвазига 700 АҚШ долларини олган вақтида ушланган. Унинг кўрсатувига асосан давом этган тадбирда, Наманган вилоят Соғлиқни сақлаш бошқармасига қарашли “Махсус захира базаси” бўлими мудири ўринбосари А.А. ҳамшира М.С.дан 700 АҚШ долларини олган вақтида ашёвий далиллар билан қўлга олинган.

Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.