Сирдарёда фуқарони ўқишга киритишини айтиб пул олган талаба ушланди

У фуқарони аввал Қозоғистондаги ОТМга ўқишга киритиб, сўнг ўқишни Тошкент иқтисодиёт университетига кўчириб беришини айтган.

Фото: Иқтисодий жиноятларга қарши курашиш департаменти

Бош прокуратура ҳузуридаги департаментнинг хабар беришича, департамент ҳамда ДХХ Оқолтин тумани бўлимлари томонидан тезкор тадбир ўтказилган. Тадбирда Тошкент ахборот технологиялари университети магистранти У.М. фуқаро Ў.О.нинг ишончига кириб, уни Чимкент давлат университетига ўқишга киритиб, сўнг ўзининг юқори лавозимда ишловчи танишлари орқали Тошкент давлат иқтисодиёт университетига ўқишини кўчириб беришни ваъда қилиб, эвазига 900 доллар олган вақтида ашёвий далиллар билан ушланган.

Қайд этилишича, мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.

Аввалроқ Наманган ва Сурхондарё вилоятларида хориждаги ОТМларидан ўқишни Ўзбекистондаги ОТМларга кўчириб беришини айтиб фуқаролардан пул олган шахслар ушланганди.