Часив Ярга ҳужум. Харобалар остидан жасадлар чиқиши давом этмоқда

9 июл куни кечқурун Донецк областидаги Часив Яр шаҳрида иккита беш қаватли уй ҳужумга учраган. Бу ҳақда Украина президенти Володимир Зеленский ва фавқулодда вазиятлар бўйича давлат хизмати маълум қилди. Донецк области маъмурияти раҳбари Павел Кириленконинг сўзларига кўра, уйлардан бирида икки подъезд буткул қулаб тушган. Ўнлаб кишилар харобалар остида қолиб кетишган. Қурбонларнинг аниқ сони маълум эмас. Сўнгги маълумотларга кўра, харобалар остидан 33 кишининг жасади олиб чиқилган (улар орасида бир бола бор), тўққиз киши тирик ҳолда топилган.

Украина ҳукумати Часив Ярга берилган зарбаларда россиялик ҳарбийларни айблаган. Павел Кириленконинг сўзларига кўра, россияликлар шаҳарни «Ураган» баравар ўт очиш реактив тизимидан ўққа тутишган. Ўз навбатида, фавқулодда ҳолатлар бўйича давлат хизмати ва Украина қуролли кучлари бирлашган кучлари гуруҳи шаҳардаги аҳоли турар жойларига зарба «Искандер» ракета мажмуасидан берилганини маълум қилган.

«Бу ракета зарбаси эди. Бундай зарбалар йўллаш учун буйруқ бераётганлар онгли равишда қотиллик қилишмоқда. Бундай зарбалардан кейин қотиллар ниманидир билишмагани ёки тушунишмагани ҳақида айтишга ҳақли эмас», — деган Зеленский видеомурожаатида ва украин шаҳарларини ўққа тутаётганларнинг ҳар бири топилишини ваъда қилган.

РФ мудофаа вазирлиги фақат икки кун ўтиб Часив Ярга берилган зарбани тасдиқлади ва бу «националистларнинг йўқ қилиниши» бўлганини таъкидлади. Вазирлик 11 июл кунги ҳисоботида «қуруқликда жойлаштирилган юқори аниқликдаги қурол билан» ушбу аҳоли пунктидаги Украина ҳудудий мудофаа кучларининг 118-бригадасининг вақтинчалик жойлашув пункти йўқ қилинганини маълум қилади. «Зарба натижасида уч юздан ортиқ националист йўқ қилинди», — дейилади хабарда. Шу билан бирга, РФ мудофаа вазирлиги версиясида зарба қачон берилганига аниқлик киритилмаган.

Россия пропагандачилари ётоқхона ҳудудида Украина ҳарбийлари жойлашганини иддао қилишмоқда. Хусусан, бундай версия таниқли кремлпараст блогер Рибар ва «Война с фейками» телеграм-каналида билдирилган. Улар ракета украин ҳарбийлари ва хорижлик ёлланма кучлар жойлаштирилган ётоқхонага бориб тушганини таъкидлашади. Шу билан бирга, Рибарнинг версиясига кўра, бинода барибир «кўчишдан бош тортган» тинч аҳоли вакиллари ҳам қолганди.

Рибар ва «Война с фейками» ўз версияларига далил сифатида қутқарувчилар харобалар остидан олиб чиққан «ҳарбий формадаги эркак» суратини келтиришади. Суратда унинг ҳарбийлигини кўрсатадиган нишон ёки бирор таниш белгилари йўқ бўлган яшил футболкадаги кишини кўриш мумкин.

Ўз навбатида, Reuters мухбирлари ушбу уйда яшаган аҳоли вакиллари билан суҳбатлашган. «Биз ертўлага югурдик, учта зарба келиб тушди, биринчиси (снаряд ) ошхонага келиб урилган», — деган агентлик суҳбатдошларидан бири.

«Иккинчисини (зарба қаерга тушганини) мен ҳатто аниқ эслай олмайман, ёрқин чақнаш бўлганди. Биз иккинчи подъезд томонга чопдик, кейин дарҳол ертўлага тушдик. У ерда бутун тун давомида қолдик. Биз нима қилгандик? Бундай бўлиши учун бизнинг одамлар уларга нима қилганди? Зулмат эди, кейин барчаси бирдан бошланди», — дея ҳикоя қилади Reuters мухбирига 64 ёшли маҳаллий аҳоли вакили Людмила.

РФ мудофаа вазирлиги ҳисоботларига кўра, июл ойи бошидан буён Часив Яр камида уч бор ўққа тутилган. Хусусан, 2 июл куни кундузи вазирлик шаҳар ҳудудида «Украина қуролли кучлари бошқарув пункти йўқ қилингани»ни хабар қилган. 9 июл куни вазирлик «РФ ҳарбий-космий кучлари юқори аниқликдаги қурол билан» америкаликларнинг М777 гаубицалари жойлаштирилган ва «Донецкдаги кварталларни ўққа тутиб келаётган 30 нафарга яқин украин жангариси йўқ қилингани» ҳақида ахборот берган. 9 июл куни кундузи област маъмурияти раҳбари Часив Ярдаги темирйўл станцияси зарбага учрагани, натижада бир неча кишида енгил контузия кузатилгани ҳақида маълумот берди.

Часив Ярга зарбалар россияликларнинг Бахмут атрофидаги транспорт инфратузилмасини йўқ қилишга қаратилган саъй-ҳаракатларининг бир қисми бўлиши мумкин. Америкадаги урушларни тадқиқ қилиш институти (ISW) мутахассислари қайд этишича, Россия кучлари Бахмутдан ғарбдаги ҳудудларга артиллерия ва ракета зарбаларини кучайтирган.

Бахмутдан шарқда июл ойи бошида Лисичанскдан олиб чиқилган украин қисмлари янги мудофаа чизиғи ташкил этган. Часив Ярдан беш километр масофадан ўтган Т0504 трассаси Бахмутни Украина назоратидаги ҳудудлар билан боғлайди. Ўз навбатида, Часив Яр темирйўл станцияси — Донбасс, Запорижжя, Харкив ва Днипро областларига хизмат қилувчи Донецк темирйўлининг бир қисми ҳисобланади.