6 ойда темирйўлда юк ва йўловчи ташиш билан боғлиқ қарийб 10 мингта камчилик аниқланди

6 ой давомида 304 та темирйўл, 113 та локомотив, 941 та юк ва йўловчи вагони носозлиги ёки фойдаланиш муддати ўтгани аниқланди.

Ўтган 6 ойда темирйўлда юк ва йўловчи ташиш билан боғлиқ 9837 та камчилик аниқланган, уларнинг 4452 таси хавфсизликка таҳдид солувчи бўлган.

Бу ҳақда АОКАда ўтказилган брифингда «Ўзтемирйўлназорат» инспекцияси ахборот хизмати раҳбари Фирдавс Хайриддинов маълум қилди.

Қайд этилишича, текшириш натижалари бўйича аниқланган камчиликларни бартараф этиш юзасидан тадбиркорлик субъектларига тақиқловчи чораларни белгиловчи 104 та бажарилиши мажбурий бўлган кўрсатмалар берилган.

2022 йилнинг 6 ойи давомида жами 304 та темирйўл, 113 та локомотив, 941 та юк ва йўловчи вагони носозлиги ёки фойдаланиш муддати ўтгани аниқланиб, фойдаланишдан тўхтатилган.