Англияда фаворитлар яна очко йўқотди, «Барселона»да яна йирик ғалаба. Кун ўйинлари

Англия: қуруқ дерби ва Гвардиоланинг йўқотиши

Эвертон – Ливерпул 0:0
Эвертон – Пикфорд, Паттерсон, Тарковски, Коуди, Миколенко, Дэвис (Гуйе, 62), Онана, Грэй, Мопе, Ивоби, Гордон (Макнил, 82).
Ливерпул – Алиссон, Александер-Арнолд (Милнер, 59), ван Дейк, Гомес, Цимикас (Робертсон, 59), Фабиньо, Эллиотт (Матип, 80), Карвалью (Фирмино, 46), Салах, Диас, Нуньес (Диогу Жота, 80).
Огоҳлантиришлар: Онана (38), ван Дейк (76), Фабиньо (90).

Ҳисоб очилмай қолган бўлса-да, Мерсисайд дербиси зерикарли  кечмади, ўйин бошиданоқ Дэйвиснинг зарбаси устунга тегди. Шундан кейин қизиллар тўлиқ куч билан олдинга ўтишди ва маълум вақт давомида «Гудисон Парк»да Пикфорд асосий қаҳрамон бўлиб турди. «Эвертон» дарвозабони сейвлари билан Нуньес ва Диаснинг уринишларини йўққа чиқарди. Ўйиннинг боришидан Юрген Клопп жамоаси барибир ўз мақсадига етишадигандек туюларди.

Аммо «ирислар» иккинчи бўлим ўрталарига келиб ўзига келди — улар принципиал рақибга кетма-кет муаммолар туғдиришди. Айниқса Мопей ажралиб турди, унинг зарбалари Алиссоннинг маҳорати туфайли голга айланмай қолди, кейин эса VAR Коадининг голини офсайд туфайли бекор қилди, бу вазиятда Мопей пас узатаётган вақтда ҳимоячи бир неча сантиметр олдинга чиқиб кетганди. Бундай шиддатли ўйин ва дарвозаларга жами 37 бор зарба берилгани ҳолида ҳисоб очилмагани ҳайратланарли. Аммо бунда ҳам мантиқийлик бор, «Эвертон» ва «Ливерпул» Англия футболида ўзаро учрашувларни голсиз ўтказиш бўйича рекордчи (36 ўйин) ҳисобланади.

Челси — Вест Ҳэм 2:1
Голлар: Чилуэлл (76), Ҳаверц (88) — Антонио (62). 

Тоттенҳэм — Фулҳэм 2:1
Голлар: Ҳёйбьерг (40), Кейн (75) — Митрович (83).

Яна бир бор ўйинни марказий ҳужумчисиз бошлаган «Челси» (АПЛга қайтган Обамеянг Барселонадаги талончилик вақтида юзидан жароҳатланганди) ҳудудлар ва тўпни назорат қилган бўлса-да, «болғачилар» мудофаасини ҳайратга сололмади. Параллел кечган Лондон дербисида эса «Тоттенҳэм» «Фулҳэм»га қарши ўйинда Ҳейбергнинг голи туфайли олдинга чиқиб олганди.

«Стэмфорд Бриж»да эса ўйиннинг бир соати ўтган маҳалда ҳам дарвоза соҳасига бирорта аниқ зарба йўлланмаганди. «Вест Ҳэм» эса қисқа вақтга олдинга ўтиши муваффақият келтирди. Боуэн тўпни ҳавода тўхтатмай йўллаган зарбадан кейин Менди қутқарди, бурчак зарбаси ижро этилганда эса Антонио ҳисобни очди. Бу ҳақиқий шок ҳолати эди, аммо «Челси» сафида захирадан ўйинга қўшилган Чилуэлл қиёфасида кутилмаган қаҳрамон топилди.

Ҳимоячи ҳужумчиларга хос тарзда ҳаракат қилиб, рақиб жарима майдонида бош билан тўп учун курашда икки ҳимоячидан устун келди ва тўпни ўзига бўйсундириб, ўткир бурчакдан туриб тўпни дарвозабон оёқлари орасидан ўтказган ҳолда ҳисобни тенглаштирди. Бу вақтда Кейн «Тоттенҳэм»нинг ғалабасини таъминлаб, голлари сонини 188 тага етказган ҳолда АПЛ тарихидаги тўпурарлар рўйхатида учинчи ўринга кўтарилганди, кўклар стадионида эса барчаси қизиқ тус олаётганди.

Биринчидан, учрашув қаҳрамони Чилуэллнинг қанотдан берган узатмасидан кейин ниҳоят Ҳаверц жорий мавсумдаги голлари ҳисобини очди, Томас Тухел уни одатда ҳужум марказида ўйнатмоқда. Иккинчидан, Англия футболи сўнгги дақиқаларда рўй берган ҳолатни муҳокама қиладиган бўлди. Гап арбитр Энди Мадлининг қарори ҳақида бормоқда, у мониторга бориб (бунақаси Англияда камдан кам рўй беради), Корненинг голини бекор қилди. Ҳакамнинг ҳисоблашича, Боуэн ҳужум вақтида Мендини босиб олиб, қоида бузган. Ҳакам ўйин давомида Жеймснинг фолини ҳам кўздан қочирди, у газонда ётган рақибга бутсасининг ост қисми билан зарба берганди. Аммо нима бўлмасин, «Челси» ниҳоят ғалабага эришди, Корне эса ҳисоб 1:1 эканида бир неча метр масофадан туриб тўпни устунга теккизганди — у Англия футболида шанба оқшомидаги энг омадсиз инсон эди.

Астон Вилла — Манчестер Сити 1:1
Голлар: Бэйли (74) — Ҳоланд (50).
Астон Вилла – Мартинес, Кэш (Янг, 27), Мингз, Конса, Динь, Буэндиа, Макгинн (Коутиньо, 65), Камара, Луис, Рэмзи, Уоткинс, Бэйли (Буэндиа, 90+2). 
Манчестер Сити – Эдерсон, Уокер (Аке, 80), Стоунз, Диаш, Канселу, Гундўған, де Брюйне, Родри, Силва (Маҳрез, 73), Фоден, Ҳоланд.
Огоҳлантиришлар: Кэш (26), Динь (71).

Энди Англиядаги ҳар бир тур олдидан бир савол туради: бу сафар Ҳоланд нечта гол уради? Айнан «қанча», «уради ёки йўқ» эмас. Шу туфайли Бирмингемдаги ўйиннинг биринчи бўлими нурсиз дуранг билан якунланиши сенсация ўлароқ қабул қилинди, «Астон Вилла»нинг мудофаадаги ўйини ва тез-тез норвегиялик футболчи билан тўқнашган Мингс — учрашувнинг ёрқин лаҳзалари бўлди. Фақат чинакам моҳир футболчилар максимал даражадаги қаршилик вақтида ўзини кўрсатишади ва Ҳоланд ҳам барибир гол урди.

Рэмси эса ҳисобни тенглаштириш учун юзага келган қулай имкониятни йўққа чиқарди. Аммо ҳисоб тенглашмаслиги адолатдан бўлмасди, «Сити» футболчилари ўз имкониятларидан фойдалана олишмади ёки буюк Мартинесдан ўта олишмади. Буни эса кимдир жазолаши керак эди ва бу тўпга бир тегинишда уни «тўққизлик»ка михлаган Бэйли бўлди. Бу бирмингемликларнинг дарвоза соҳасига йўллаган илк зарбаси бўлди, Коутиньонинг голи эса офсайд туфайли бекор қилинди.

Бу Стивен Жеррардга ўзини руҳан ғолиб ҳис қилишга халал беролмади, Ҳоланд эса Англия чемпионатидаги 10 голи учун атиги олти ўйин ўтказиб, Куиннинг рекордини такрорлади.

Испания: Винисиус тавқи лаънатни ечди, Кунде «Севилья»га раҳм қилмади

Реал – Бетис 2:1
Голлар: 1:0 – 9 Винисиус Жуниор, 1:1 – 17 Каналес, 2:1 – 65 Родриго.
Реал Мадрид – Куртуа, Карвахаль (Рюдигер, 90), Алаба, Милитао, Менди, Модрич (Кроос, 80), Тчуамени, Камавинга (Вальверде, 63), Бензема, Винисиус Жуниор, Родриго (Себальос, 80).

«Сантьяго Бернабеу» шанба куни куннинг марказий ўйинини қабул қилди, бу ўйинга рақиб жамоалар ўтган уч турдаги юз фоизлик натижа билан етиб келганди. «Бетис» мадридликларнинг голига тезкорлик билан жавоб қайтариб, ўз муваффақияти тасодиф эмаслигини намойиш этди. Лекин бунда ажабланарли жиҳат йўқ. Биринчидан, оқ-яшиллар бош мураббийликка Мануэл Пеллегрини келганидан буён фақат ўсмоқда. Иккинчидан, андалусияликлар пойтахтга тарихий серия билан ташриф буюрди — жамоа «Қироллик клуби»га қарши сўнгги беш сафар ўйинида гол ўтказмаганди.

«Реал»нинг бу жамоага қарши уй ўйинларидаги сўнгги муваффақияти 2017 йил мартига тўғри келади, ўшанда Серхио Рамос гол урганди. Шундан кейин мадридликларда икки мағлубият ва уч голсиз дуранг бўлган, шундай экан, Винисиус Жуниор Алабанинг узоқ масофага узатмасидан кейин тўпни дарвозабон устидан ошириб ташлаган ҳолда, амалда тавқи лаънатга барҳам берди. Қолгани техника иши эди, иккинчи бўлимда Вальверде ва Родригу ғалаба голини уюштиришди. «Бетис» мухлисларини эса захирадан ўйинга қўшилган 40 ёшли Хоакин Испания чемпионатида 20-мавсумида ўйнаб, ла лига рекордини ўрнатгани таскин бериши мумкин.

Севилья — Барселона 0:3
Голлар: Рафинья (21), Левандовски (36), Гарсия (50).
Севилья – Буну, Монтьель (Сусо, 64), Фернандо, Ньянзу, Акунья, Ракитич, Гудель (Кармона, 46), Жордан (Дилэйни, 46), Иско (Гомес, 70), Ламела, Ан-Носири (Дольберг, 57). 
Барселона – тер Стеген, Кунде, Араухо, Эрик Гарсия (Роберто, 55), Бальде (Альба, 64), Бускетс, Педри (де Йонг, 63), Гави, Левандовски (Фати, 74), Дембеле (Торрес, 63), Рафинья.
Огоҳлантиришлар: Дембеле (9), Бальде (28), Жордан (33), Кармона (66), Араухо (75), Роберто (89).

Андалусияликлар «Барселона»га қарши ўйинни жуда кучли бошлашганди. Каталонияликлар бу мавсумда ҳали бундай қийинчиликка дуч келишмаганди, аммо Ракитич, Иско ва Ан-Носирий гол ура олишмади, меҳмонлар эса имкониятларидан фойдаланишди. Левандовскининг зарбасидан кейин ҳимоячи тўпни дарвоза чизиғидан қайтарганди, тўпга биринчи бўлиб Рафинья етиб келди.

Полшалик футболчининг ўзи орадаги фарқни оширди, Кунде олис масофадан тўпни жарима майдонига етказиб берганида меҳмонлар марказий ҳимоячилари уни қаровсиз қолдиришди. «Севилья»ни Диего Карлос ва Кунде тарк этгач, жамоа ҳимояси жуда тарқоқ ҳолга келган. Француз футболчиси иккинчи бўлимда ҳам Эрик Гарсия гол уришида асосий ишни бажарди. Мудофаа марказидаги бу икки футболчи бор экан, Пике захира ўриндиғида ғамга ботиб ўтириши ёки «Барса»нинг навбатдаги йирик ғалабасини нишонлаши мумкин.

Германия: «Бавария» яна ғалабасиз

Жума кунги ўйинда Дортмунднинг «Боруссия» клуби ғалабага эришгач, Берлиндаги ўйин чемпионатнинг иккинчи ва учинчи жамоалари тўқнашувига айланди, ғолиб жамоа турнир жадвалида яккапешқадамга айланиб олиши мумкин эди. «Унион» ўтган мавсумдаги натижалар такрорланмаслиги учун бор кучини ишга солди - ўтган мавсумда «Бавария»га қарши ўйинларда йирик ҳисобдаги мағлубиятлар қайд этилганди (2:5, 0:4). Ўшанда голларнинг тўрттаси Левандовски ҳисобига ёзилганди, усиз амалдаги чемпионлар у қадар даҳшатли кўринмаяпти.

Ҳозирда рақибларга суринамлик Беккер даҳшат солмоқда, у шанба кунги ўйинда ҳам ҳисобни очди. Унинг жарима зарбаси амалга оширилганида тўпни ҳавода тўхтатмай йўллаган зарбаси Нойерни иложсиз қолдирди ва берлинликлар ҳужумчиси турнир тўпурарлари рўйхатида биринчи ўринга кўтарилди. Ҳа, Киммиҳ тезда мувозанатни тиклади, аммо «Бавария» бошқа имкониятларидан фойдалана олмади. Жамоа қаторасига иккинчи ўйинда дуранг қайд этди, Дортмунд жамоасига эса бу турда Леверкузенда ажойиб ўйин кўрсатган «Фрайбург» етиб олди.

Кристиан Штрайх жамоаси қаторасига уч ғалабадан кейин қўшимча кўрсаткичлар бўйича турнир жадвалида биринчи ўринга чиқди, ўз тарихида иккинчи бор ўйин кунини турнир жадвалининг биринчи поғонасида якунлади. Бундай ҳолат илк бор 2000/01 йилги мавсумда кузатилганди. «Байер» эса қулашда давом этмоқда, жамоа беш турда тўрт бор мағлубиятга учради.

Бундеслигада Чемпионлар лигасининг икки иштирокчиси мавсумни синхрон бошлади ва дастлабки ғалабаларига фақат тўртинчи турга келиб эришди. Табиийки, ўзаро учрашув шу саволга жавоб топиши керак эди: ким ўз муваффақиятини мустаҳкамлай олади. «Лейпциг» ҳозирда кўтарилиш жараёнидадек кўринганди, ҳафта ўртасида «ҳўкизлар» кубок ўйинида 8:0 ҳисобида ғалабага эришганди. Аммо ўтган мавсумда «Нант» сафида ёрқин ўйин кўрсатган Коло-Муани Доменико Тедеско учун муаммога айланди.

Айни вақтда Борре ва Аларио билан рақобатда устун келаётган ушбу француз олти дақиқа ичида икки гол уюштирди. Аввалига тўпни боши билан Камадуга қулай қилиб ошириб берди, кейин эса жарима майдонида Роде билан ажойиб комбинация уюштирди, зарба берилганида эса рикошет ҳам ёрдамга келди. Ўйиннинг иккинчи қисмида «Лейпциг» яна икки гол ўтказиб юборди ва турнир жадвалининг иккинчи қисмида қолди. Бир йил муқаддам Тедеско жамоани инқироздан олиб чиққанди, аммо бу сафар у ўзининг ҳисоб-китобларидаги хатоликларни тузата олармикин?

Франция: Неймар рекорд сериясини тўхтатди

Нант — ПСЖ 0:3
Голлар: Мбаппе (18, 54), Мендеш (68).
Нант – Лафон, Фабио, Паллуа, Кастеллетто (Коршья, 66), Жиротто, Аппиа, Чиривелья, Мутуссами (Дусе, 80), Блас (Аши, 85), Муҳаммад (Коко, 80), Гессан (Ганаго, 67). 
ПСЖ – Доннарумма, Ҳакими, Данилу Перейра, Маркиньос, Кимпембе, Бернат (Мендеш, 46), Верратти (Рамос, 63), Витинья (Саншеш, 33), Сарабия (Экитик, 70), Месси, Мбаппе (Неймар, 63).
Огоҳлантиришлар: Паллуа (33), Бернат (45), Верратти (50), Мбаппе (58), Рамос (69).
Четлатиш: Фабио (24).

Бир йил муқаддам «ПСЖ» Франция Суперкубогида «Нант»ни йирик ҳисобда мағлуб этганди, энди эса «канарейкалар»ни сафарда ранжитиб қайтди. Антуана Комбуаре жамоаси, албатта, кўп бор характер кўрсата олган, аммо биринчи голдан кейин Фабио четлатилганида мўъжиза кутишга ҳожат йўқлиги аён бўлди. Бу ўйинда клуб ва терма жамоадаги сўнгги 16 ўйинни гол ёки голли пассиз тарк этмаган Неймарнинг серияси якун топди.

«Божуар»да Мбаппенинг голларига Месси ассистентлик қилди. Неймар сериясини давом эттиришига Кристоф Гальтье уни захирада қолдиргани сабаб бўлди, бразилиялик футболчи 63-дақиқада Мбаппе ўрнига майдонга тушди ва Нуну Мендешнинг голида иштирок этди, аммо унинг ҳисобига балл ёзилмади.

Кун статистикаси

• «Ювентус» дарвозабонлари А Серияда  сўнгги 7 пенальтидан 4 тасини қайтарган.
• «Вердер» ҳужумчиси Фюллькруг дастлабки беш турда 5 гол урди. Бременликлар футболчиси сўнгги бор 2005/06 йиллар мавсумида Клозе ва Класнич томонидан қайд этилган натижани такрорлади.
• «Тоттенҳэм» стартдаги олти турда 14 очко тўплади — бу клуб рекорди такрорланишидир.
• 63-дақиқа — «Атлетико» ҳужумчиси Антуан Гризманн бу мавсумда тўрт ўйинда шу дақиқада майдонга чиқди. Испанияда хабар беришларича, «матрасчилар» «Барселона»га француз учун қўшимча 40 миллион евро тўламаслик учун унга кўп ўйин вақти бера олмайди - шартномада Гризманн ижара вақтида ўйинларнинг 50 фоизидан ортиғида 45 дақиқадан кўпроқ ўйнаса, «Атлетико» «Барселона»га шунча маблағ тўлаши кераклиги кўрсатилган.