Тошкент вилояти фаоллари билан навбатдан ташқари сессияда учрашган президент Шавкат Мирзиёев коррупция муаммоси, хусусан давлат маблағлари талон-торож қилинаётганига тўхталди.
Фото: Президент матбуот хизмати
“Бош прокурор ўринбосари Йўлдошев, бугун Тошкент вилоятига ажратилган ҳар бир сўм маблағ учун шахсан жавоб берасиз. Чунки президент ажратса ҳам бунинг ҳаммаси халқнинг пули.
Давлат маблағларини талон-торож қилиниши ҳолатлари бор. Сизлар порахўрни ушлаб қамайсизлар, лекин у қилар ишни қилиб бўлиб қамалганининг нима фойдаси бор? Қамалишининг олдини олиш, ўғирликларни камайтириш керак.
Шундай қилингларки, ҳар бир сўм мақсадлик сарфлансин. Банклардан ажратилишидан бошлаб ўз ўрнида ишлатилишига бўлган ҳар бир жараённи назорат қилинг”, – дея президент сўзларидан иқтибос келтирмоқда Kun.uz мухбири.
