Ўзбекистон Ҳиндистонга янги транспорт йўлагини ишга тушириш ниятида 

Ўзбекистон ва ЭСКАТО "Ўзбекистон – Туркманистон – Эрон – Ҳиндистон" транспорт йўлаги техник-иқтисодий асосини ишлаб чиқиш бўйича келишувга эришди.

Ўзбекистон Инвестициялар ва ташқи савдо вазирлигида Осиё ва Тинч океани учун Иқтисодий ва ижтимоий комиссия (ЭСКАТО) делегацияси билан учрашув бўлиб ўтди. 

Учрашувда Чобаҳор порти орқали "Ўзбекистон – Туркманистон – Эрон – Ҳиндистон" транспорт йўлагини ривожлантириш масалалари муҳокама қилинди.

Музокараларда яқин келажакда 1 миллиард долларга етадиган Ўзбекистон ва Ҳиндистон савдо айланмаси барқарорлигини таъминлайдиган янги транспорт йўлаги техник-иқтисодий асосини ишлаб чиқиш бўйича келишувга эришилди. 

Мазкур йўлак яқин истиқболда 3,2 миллиард долларни ташкил этиши мумкин бўлган Марказий Осиё мамлакатлари ва Ҳиндистон ўртасидаги ўзаро савдо муносабатлари доирасида маҳсулот етказиб бериш узлуксизлигини таъминлашга ҳам қаратилган.