The Times of India хабарига кўра, аппарат мустақил парвоз қилиш, йўналишни белгилаш ва тактик манёврларни бажаришга мўлжалланган. Компания ундан разведка, кузатув, зарба бериш ҳамда бошқа самолётлар билан биргаликдаги операцияларда фойдаланишни кўзламоқда.
FWD Supreme Heavy тахминан бир тонна вазнли учиш аппаратлари тоифасига киради. Ишлаб чиқарувчи эълон қилган кўрсаткичларга кўра, унинг крейсерлик тезлиги соатига 500–600 километр, парвоз давомийлиги икки соат, фойдали юк кўтариш қуввати эса қарийб 350 килограмм бўлиши керак. Компания парвоз масофасини 1500 километрдан ортиқ деб кўрсатган.
Бу рақамлар ҳозирча ишлаб чиқарувчининг баёнотига асосланган. Тақдимотда ердаги прототип кўрсатилган, хабарда эса парвоз синовлари натижалари келтирилмаган.
FWDA маълумотига кўра, платформа тўлиқ Ҳиндистонда ишлаб чиқилган ва мамлакатнинг ўзида ишлаб чиқарилади. Компания ўз технологиялари, сунъий интеллект тизимлари ва ишлаб чиқариш ҳажмини ошириш орқали илғор жанговар авиацияни арзонлаштиришни мақсад қилган.
