«Тоттенҳэм» биринчи бўлимнинг катта қисмини ўз томонида ўтказди. Бу «Арсенал»нинг устунлик қилиш истаги туфайли ҳам, Антонио Конте иккинчи рақам остида ўйнашни хуш кўриши ва буни яхши уддалаши туфайли ҳам бўлди. Онда-сонда қилинган ҳужумлардан бирида Ришарлисон яқин масофадан зарба берди, аммо Рамсдейл гол бўлишига йўл қўймади.
Партей жарима майдони ташқарисидан йўллаган ажойиб зарбаси билан тўпни дарвозанинг юқори бурчагига жойлаштирганида меҳмонларнинг режаси барбод бўлгани маълум бўлди. Аммо «Тоттенҳэм» рақиб ҳужумларининг навбатдаги тўлқинига туриб берди ва қарши ҳужум уюштирди, унинг якунида Ришарлисон пеналти ишлади, Кейн уни аниқ ижро этди. Шу тариқа бу форвард АПЛда сафар ўйинларида 100 гол урган биринчи футболчига айланди ва Лондон дербиларида гол уриш бўйича Тьерри Анрининг рекордини (44) янгилади.
Умуман олганда, ўйин анча томошабоп кечди ва «Тоттенҳэм»нинг қарши ҳужумлари ҳам «канонирлар»нинг ҳаракатлари каби завқли чиқди. Иккинчи бўлим бошида Габриэл Жезус жарима майдони ичида Ллорисни ожиз қолдирди - франциялик дарвозабон Саканинг мураккаб зарбасини қайтарганди, бразилиялик ҳужумчи қайтган тўпни дарвозага жойлаб қўйди.
Эмерсон кераксиз вазиятда, майдон марказида Мартинеллини тепиб, қизил карточка олгач, меҳмонлар янада қийин аҳволда қолишди. Мартинелли футбол майдонида қасд олди ва Чаканинг голига ҳаммуаллифлик қилди. Шундан кейин ўйин масаласи амалда ҳал бўлди: «Арсенал» «Тоттенҳэм» билан орадаги фарқни тўрттага оширди ва якшанба куни бўлиб ўтадиган Манчестер дербисида қандай натижа қайд этилишидан қатъи назар биринчи ўринни сақлаб қоладиган бўлди.
Грэм Поттер «Челси»га ўтиб кетган, «Брайтон» эса ҳамон ҳар қандай рақибга муаммолар туғдиришда давом этмоқда. Ҳатто «Ливерпул»га «Энфилд»даги ўйинда ҳам. Ўйиннинг 4-дақиқасидаёқ Уэлбекнинг товон билан берган пасидан кейин Троссар ҳисобни очди. Юрген Клопп учун бу уйғотувчи қўнғироқ эмас, бонг урилиши эди, чунки «чайкалар» битта голга қаноат қилмоқчи эмасди. Троссар тез орада иккинчи голни урди, агар Алиссон бўлмаганида, бу ўйин қизиллар учун ўта қайғули якунланиши мумкин эди.
Мезбонлар бўлимнинг иккинчи ярмида фаоллашди ва Салоҳнинг пасидан Роберто Фирмино ҳисобни қисқартирди, вазиятга VAR аралашиб, мисрлик футболчида офсайд қайд этган бош ҳакамнинг биринчи қарори тузатилди. Иккинчи бўлим бошида эса бразилиялик футболчи меҳмонлар мудофаасини доғда қолдириб ҳисобни тенглаштирди, бундан бироз аввалроқ «Ливерпул» учинчи голни ўтказиб юборишига бир бахя қолганди.
Қизил иблислар учун бу мавсум қийин кечмоқда характер кўрсатиш талаб этилмоқда. Аммо на ирода ва на Алиссоннинг сейвлари муваффақиятни кафолатлай олмайди. Александр-Арнольд бу ўйинда ҳам ўз анъанасига содиқ қолиб, ўйинни қўпол хатоларсиз ўтказа олмади. Ҳет-трик қайд этган Троссар эса «Энфилд»да АПЛ ўйинларида фақат Ндлову ва Андрей Аршавин қила олган (россиялик футболчи покерга эришганди) ишни уддалади, у ўз голларидан бирига Трентни ҳаммуаллиф деб санаса ҳам бўлади.
«Челси» Томас Тухелнинг истеъфосидан кейин илк ғалабасига эришди, лекин бунда нафақат маҳорат, балки ирода кўрсатиш ҳам талаб этилди. Тез ўтказиб юборилган голга кўклар Обамеянгнинг голи билан жавоб қайтарди, габонлик ҳужумчи АПЛда 344 кундан буён гол урмаётганди. У Тиагу Силва ташлаб берган тўпни дарвозага орқа турган ҳолда қабул қилиб олди ва айланиб зарба берди. Лекин бу ўйинда бразилиялик фахрий футболчига саволлар туғилди. Аниқроғи, арбитрга, у қўл билан ўйнаган футболчини майдондан четлатиши мумкин эди. Аммо VAR хонасидаги текширувга қарамай, у бундай қарор қабул қилмади.
Ўйиннинг охирги дақиқаларида эса кўклар жамоаси мухлислари Галлаҳернинг узоқ масофадан берган аниқ зарбасидан баҳра олишди. Барча ҳиссиётга берилди, аммо ўз фаолиятининг энг яхши дамларини «Кристал Пэлас»да ижара асосида ўтказган яримҳимоячининг ўзи голини нишонламади.
Сўнгги йилларда «кучли учлик»даги клублар билан ёнма-ён юрган «Севилья» — бу мавсумдаги энг ишончни оқламаган жамоа бўлмоқда. Етти турдан кейин бир ғалаба ва беш очко — ёздаёқ истеъфоси сўрала бошланган Хулен Лопетеги жамоаси учун жуда ёмон кўрсаткич. Ўшанда бу фақат миш-мишлар билан чекланганди, аммо ҳозир мураббий лигада истеъфо учун асосий номзод бўлиб турибди.
«Атлетико» билан ўйин аввалбошдан андалусияликларга яхши натижа ваъда қилмади. «Матрасчилар»да ҳам мавсум бир текисда кетмаяпти, лекин улар танаффусдан кейин кучлироқ бўлиб қайтишганини намойиш этишди, Мората эса бу рақибга қарши қаторасига учинчи ўйинда гол урди. «Севилья» агар ҳозирги темпда давом этса, 1996/97 йилги мавсум натижаси такрорланади, ўшанда жамоа сегундага тушиб кетганди.
Терма жамоалар ўйинлари учун ажратилган танаффус «Барселона» учун даҳшатли тушга айланди, Хави Депай, Френки де Йонг, Кунде ва Араухосиз қолди, Араухо ЖЧ-2022 турнирини ҳам ўтказиб юборади. Шу туфайли Мальоркада бошланғич таркибда бир ойдан буён ўйнамаётган Пике ва Жорди Альба ҳам ўрин олди.
Левандовски қаторасига олтинчи турда гол урди, у бир финт билан ҳимоячини йўлдан олди ва тўпни узоқ бурчак томон йўналтьирди, аммо ўйинда меҳмонлар тотал устунликка эриша олишмади. «Мальорка» вақти-вақти билан каталонияликлар ҳимоясини безовта қилиб турди ва Тер Штеген фақат омад туфайли қаторасига бешинчи ўйинда дарвозаси дахлсизлигини сақлаб қола олди.
Аммо асосийси, ғалабали серия давом эттирилди, Хави эса ла лигада қаторасига 18 сафар ўйинида мағлуб бўлмасдан, Зинедин Зиданнинг рекордини янгилади.
Италия: Моуриньо «Интер» билан боғлиқ комплексни енгиб ўтди
Ўтган мавсумда Жозе Моуриньо собиқ жамоасига қарши учта ўйинни ҳам (кубок ўйини билан бирга) бой берганди ва бу ўйинлардан биридан сўнг футболчиларни характерсизликда ва топ-рақиблар билан ўйнашдан қўрқишда айблаганди. Бу ўйин бошида ҳам римликлар бундай муаммодан қутула олмагандек кўринди.
Жеконинг голи видеотакрордан кейин бекор қилингани меҳмонларни енгил тин олдирди, аммо кўп ўтмай Барелланинг паси ўтган ҳафтада Миллатлар лигасида терма жамоада ўзини аъло даражада намойиш этган Димарконинг голига айланди. Аммо ҳозирги «Рома» ўтган йилгисидан мустаҳкамроқ бўлиб чиқди. Қолаверса, жамоага маҳоратли футболчилар келиб қўшилган, буни Дибаланинг голлари кўрсатиб турибди.
Ёзда аргентиналик ҳужумчини Миланда кутишганди, энди эса трибуналар унинг муваффақиятига ҳуштакбозлик қилишмоқда, у алмаштирилаётганида ҳам ҳуштаклар билан кузатиб қўйишди. Фақат Дибала ва унинг шерикларини бу билан енгиб бўлмасди. Римликлар иккинчи бўлимда «Интер»нинг барча ҳужумларини тўхтатишди ва стандарт вазиятда ўз имкониятидан фойдаланишди, Смоллинг Пеллегринининг узатмасидан ғалаба голини урди. «Рома» етакчиларга яқинлашди, «Интер» эса 10 йил ичида илк бор стартдаги саккиз ўйинда тўрт бор мағлуб бўлди ва жамоа айни вақтда еврокубок ҳудудидан ташқарида қолмоқда.
«Милан»да ҳамшаҳарларидан фарқли ўлароқ ишлар яхши кетмоқда, аммо «Эмполи»га қарши ўйинда муаммолар юзага келди. Меҳмонлар жуда қулай вазиятларни кўкка совуришди, кейин Салемакерс ва Калабрия жароҳат олиб сафдан чиқди, иккинчи бўлим давомида эса — Кьер ҳам жароҳат олди. Энди Чемпионлар лигасида Стефано Пиоли учун бош оғриғи кафолатланган, лекин бу шанба куни ҳам бор эди. Аввалги турларда асосий дарвозабон Менян сафдан чиққани туфайли Тэтэрушану бир неча метрлардан йўлланган зарбаларни қайтаришига тўғри келди.
Миланликлар иккинчи бўлимда стандарт вазиятлардан максимум фойда чиқаришга ҳаракат қилди. Аммо Жирунинг жарима зарбаси тўсинга тегди, Тоналининг зарбаси рикошет орқали мураккаб йўналиш олганида эса Викарио ақл бовар қилмас ҳаракат билан бурчакка кетаётган тўпни олиб чиқди. Бу сафар ҳам Рафаэл Леау қутқарди, аут ташлаб берилганда ҳимоячилар ортига югуриб ўтган ҳужумчи Ребичга идеал пас берди.
Барчаси «Милан»нинг навбатдаги қийин ғалабасига қараб кетаётганди, аммо ўйин охири ҳақиқий триллерга айланиб кетди. Қўшимча дақиқаларда жарима зарбасини ижро этган Байрами чемпионларга Менян жамоа учун қанчалик кераклигини эслатиб қўйди, унинг ўрнига ўйнаётган руминиялик дарвозабон ўзи турган бурчак томон йўлланган зарбани ўтказиб юборди. Шунга қарамай россонери тезда ташаббусни қўлга олди, аввалига Крунич боши билан тўпни дарвоза қаршисида турган Балло-Туренинг оёғига ташлаб берди, кейинги вазиятда эса Леау қарши ҳужумда рақибни жазолади. «Милан»да ҳамон ўша-ўша ақл бовар қилмас характер.
Жума куни «Байер»ни йирик ҳисобда мағлуб этиб (4:0), «Бавария» иккинчи ўринга кўтарилганди. Чемпионлар яна бир бор Германияда ким зўрлигини намойиш этмоқда, рақобатчилар эса — одатдаги каби босим остида қалтирай бошлади. «Унион» ўз ўйинини топиб бораётган ва еврокубоклар ҳудудига кириб келган «Айнтрахт» йўлидан чиқиб, ютқазди, Гётце ва Линдстрём ўйин масаласини биринчи бўлимдаёқ ҳал қилди. «Унион» биринчи ўринда қолаётган бўлса-да, «Бавария» билан орадаги фарқ икки очкогача қисқарган.
Берлинликлар фиаскоси ортидан Дортмунднинг «Боруссия»си яккапешқадамга айланиб олиши мумкин эди ва жамоа «Кёлн»га қарши сафар ўйинини яхши бошлаганди. 19 ёшида жамоани сардор сифатида майдонга бошлаб тушган Беллингем ўз паси билан Брандт майдон марказидан ёриб кириб, ҳисобни очишига ёрдам берди, аммо танаффусдан кейин барчаси ўзгариб кетди. «Асаларилар» уч дақиқа ичида икки гол қабул қилиб олишди, иккинчи голни «Боруссия» 1,5 миллион евро эвазига «Кёлн»га сотиб юборган Тиггес урди.
Натижада шанба кунги ўйинлардан энг кўп фойда олган жамоа «Фрайбург» бўлди. Бу жамоа яқингача биринчи ўринда бораётганди, аммо кетма-кет дуранглардан («Боруссия» М ва «Ҳоффенҳайм»га қарши ўйинлар бир хил - 0:0 ҳисобида якунланди) кейин позициясини йўқотганди. «Майнц»ни мағлуб этиб Кристиан Штрайх жамоаси очколар сони бўйича «Унион»га етиб олди ва фақат қўшимча кўрсаткичлар туфайли иккинчи ўринда жойлашган. Учинчи ўринга тушиб қолган «Бавария» эса якшанба куни «Ҳоффенҳайм» «Ҳерта»ни мағлуб этса, яна учликдан ташқарида қолиши мумкин.
Месси жарима зарбаларини ижро этиш бўйича мастер-класс кўрсатишда давом этади. Шу кунларда у терма жамоада шундай гол урганди, энди эса — клуб учун. Аргентиналикнинг зарбасидан кейин «Ницца»да дарвозани қўриқлаётган Шмейхел ҳатто ўрнидан қўзғалишга улгурмади, аммо собиқ жамоаси Кристоф Гальтьени қийнаб қўйди. Парижликлар фақат ўйин охиридагина Мбаппе жарима майдони марказида туриб дарвозани ўққа тутганидан кейингина вазиятни ўз томонига оғдира олди. Бу ғалабадан кейин «ПСЖ» шу турда ғалаба эвазига биринчи ўринга кўтарилган «Марсель»ни яна қувиб ўтди, Серхио Рамос эса лига 1 рекордини такрорлади. Испаниялик футболчи таркибда бўлганида жамоа 21 ўйиндан бирортасида мағлуб бўлмаган.
«Кадис» етти турда 1 гол урди. Бундай ёмон кўрсаткич сўнгги бор 2001/02 йиллар мавсумида «Мальорка»да кузатилган.
«Лейпциг» сафида расмий ўйинларда 1-чи бўлиб 100 гол урган футболчи Вернер бўлди.
«Тоттенҳэм» ҳужумчиси Кейн «Арсенал» дарвозасига урган голлари сонини 14 тага етказди. У бунгача «канонирлар» учун энг хавфли футболчилар қаторида «Челси»нинг собиқ ҳужумчиси Дрогба билан бир хил натижа кўрсатиб турганди.
Нидерландия чемпионатида яримҳимоячи Классен 100 балл (67 гол, 33 узатма) тўплади. Бундай натижага яна уч футболчи эришганди ва уларнинг барчаси «Аякс» футболчилари — Луис Суарес, Ҳунтелар ва Тадич.
«Зальцбург» сафида австриялик ҳимоячи Ульмер 370-ўйинини ўтказди ва бу борадаги клуб рекордини такрорлади.
